Міліцыя шукае гаспадароў «дрэва эканамічнага цуду»

Грамадзкі актывіст Аляксей Коўтун быў выкліканы ў міліцыю, дзе распытвалі пра акцыю «ў якасьці сьведкі». Выклік міліцыянты аргумэнтавалі тым, што Коўтун даваў камэнтары пра гэтую акцыю журналістам:

«Мне паказалі раздрукоўку артыкулу з інтэрнэту і фотаздымкі акцыі. Там быў камэнтар ад майго імя. А потым сказалі, што па гэтым факце яшчэ вядзецца праверка, і мне потым паведамяць пра яе вынікі».

Спадар Коўтун удакладніў у міліцыянта, што праверка праводзіцца па адміністрацыйным артыкуле «парушэньне парадку арганізацыі і правядзеньня масавага мерапрыемства або пікетаваньня».

Падчас згаданай акцыі на Савецкай вуліцы было «пасаджана дрэва», на якім замест лісьця віселі грошы і «лятарэйныя білеты» з выявай казачнага пэрсанажа Бураціна. Акрамя таго, да дрэва быў прымацаваны плякат з выявай Бураціна і надпісам «Дрэва эканамічнага цуду».