Лінкі ўнівэрсальнага доступу

Нябачная сям’я Пуціна


Сёньняшняя прэзыдэнцкая інаўгурацыя Ўладзімера Пуціна і прэзыдэнцкія выбары ў Расеі 4 сакавіка — гэта былі дзьве вельмі рэдкія нагоды, калі расейцы маглі ўбачыць Людмілу Пуціну, жонку свайго былога прэм’ер-міністра ды былога і цяперашняга прэзыдэнта.

Чым даўжэй Пуцін кіруе Расеяй, тым большым табу ў краіне робіцца інфармацыя пра сям’ю Ўладзімера Пуціна — да такой высновы прыходзіць аўтар New York Times, Дэйвід Гершэнгорн.



Гершэнгорн нагадвае, што адразу пасьля выбараў у інтэрнэце зьявіўся здымак, на якім быў паказаны Пуцін, якія спрабуе паціснуць жонцы руку, са зьедлівым подпісам-камэнтарам: «Да пабачэньня праз шэсьць гадоў».



Гершэнгорн кажа, што большасьць расіянаў лічыць, што Пуцін не жыве са сваёй жонкай. У красавіку 2008 году ў газэце «Маскоўскі карэспандэнт» быў апублікаваны артыкул з чуткамі, што Пуцін нібыта мяркуе разьвесьціся зь Людмілай і пабрацца шлюбам з Алінай Кабаевай (нар. 1983), алімпійскай чэмпіёнкай па мастацкай гімнастыцы. Пуцін рашуча запярэчыў гэтым чуткам. Газэта спыніла выхад у лістападзе таго самага году.

Таксама невядома, дзе насамрэч жывуць дочкі Уладзімера і Людмілы Пуціных, Марыя (27 гадоў) і Кацярына (25 гадоў), і як яны сёньня выглядаюць. Даступныя ў інтэрнэце здымкі дзяўчат паходзяць зь іх раньняга дзяцінства. Паводле інфармацыі, сабранай Гершэнзонам, абедзьве закончылі нямецкамоўную школу і Санкт-Пецярбурскі дзяржаўны ўнівэрсытэт. Абедзьве нібыта мелі рамантычныя сувязі з замежнікамі — старэйшая зь нідэрляндцам, а маладзейшая з карэйцам з Паўднёвай Карэі.

Пуцін, сьцьвярджае аўтар New York Times, асабліва пільнуе, каб зьвесткі пра ягонае прыватнае жыцьцё не прасочваліся ў прэсу. Пагадзіўшыся выступіць у дакумэнтальным фільме аднаго нямецкага кінэматаграфіста, Пуцін паставіў цьвёрдую ўмову: ягонае прыватнае жыцьцё застанецца па-за кадрам. Фільм пад назвай «Ich, Putin» быў выпушчаны на экран сёлета. Яго аўтар, Губэрт Зайпэль, адмовіўся паведаміць журналістам нейкія дэталі зь сямейнага жыцьця Ўладзімера Пуціна.

Пуцін паставіў цьвёрдую ўмову: ягонае прыватнае жыцьцё застанецца па-за кадрам

Паводле Гершэнгорна, заслона сакрэтнасьці, за якой Пуцін памясьціў сваё сямейнае і прыватнае жыцьцё, не характэрная ня толькі для заходніх, але і для савецкіх ды постсавецкіх палітыкаў. У гэтым кантэксьце Гершэнгорн прыгадвае дачку Барыса Ельцына, якая брала актыўны ўдзел у публічным жыцьці і была палітычным дараднікам бацькі; зь яшчэ ранейшага пэрыяду аўтар згадвае дачку Сталіна, Сьвятлану Алілуеву (1926-2011), якая была публічнай постацьцю ў СССР у сваім дзяцінстве і маладосьці.

Былы расейскі журналіст Алег Ралдугін, які зьяўляецца хросным бацькам дачкі Пуціна, Марыі, лічыць, што трымаючы ў таямніцы лёс сваіх дачок, прэзыдэнт Расеі забясьпечвае ім насамрэч «нармальнае жыцьцё». Ралдугін таксама адмовіўся даць Гершэнгорну нейкую інфармацыю пра сямейнае жыцьцё Пуціна.

Глядзець камэнтары (3)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG