НАДВОР'Е
У Беларусі чакаецца сонечнае надвор'е, тэмпэратура да плюс 21 градуса.
У БЕЛАРУСІ І СЬВЕЦЕ
Прэсавая канфэрэнцыя былога кандыдата ў прэзыдэнты Дзьмітрыя Вуса з нагоды стварэньня ініцыятыўнай групы дзеля зьмены выбарчага заканадаўства Беларусі. Вул. Наватарская, 35, пачатак а 12.00.
У Брусэлі – дыскусія: «Рэформа дзяржаўнага кіраваньня ў краінах Усходняга партнэрства – як далёка, наколькі глыбока?»
ТАКСАМА Ў ГЭТЫ ДЗЕНЬ:
Усясьветны дзень свабоды друку
Дзень Канстытуцыі ў Польшчы
У вечаровым эфіры – перадачы «Паштовая скрынка 111» – агляд лістоў на Свабоду, які падрыхтаваў Валянцін Жданко. Тэма перадачы Аляксандры Дынько «Вашы дзеці» – чым і як карміць дзяцей.
* * *
Паважаныя наведнікі сайту! Дапамажэце больш поўна прадставіць беларускі дзень — дашлеце інфармацыю пра плянаваныя падзеі, якія будуць цікавыя нашым чытачам, на адрас svaboda@rferl.org.
ГЭТЫ ДЗЕНЬ У ГІСТОРЫІ
1791 – Сойм Рэчы Паспалітай зацьвердзіў першую ў Эўропе Канстытуцыю.
У гэты дзень нарадзіліся:
1469 – Нікола Макіявэлі, італьянскі палітычны й вайсковы тэарэтык, гісторык, пісьменьнік і дыплямат.
1620 – Багуслаў Радзівіл, вайсковы і дзяржаўны дзяяч Вялікага Княства Літоўскага, мэцэнат.
1877 – Антон Грыневіч, зьбіральнік беларускага музычнага фальклёру, выдавец. Загінуў у ГУЛагу.
1882 – Уладзіслаў Галубок, беларускі драматург, актор і рэжысэр, заснавальнік беларускага савецкага тэатру. Загінуў у ГУЛагу.
1892 — Аляксандар Вальковіч, прадстаўляў БНР пры ўрадзе Грузіі, народны сакратар фінансаў БНР. Падчас польскай акупацыі Беларусі ў 1919—1920 гадах быў арыштаваны, уцёк за мяжу. У 1925 годзе вярнуўся ў БССР. Арыштаваны 25 траўня 1937 году. Расстраляны.
1953 – Франц Сіўко, беларускі празаік, публіцыст. Ягоны артыкул у «ЛіМе» ў 1986 годзе «Прашу вызваліць...» пра вывучэньне беларускай мовы ў школах выклікаў дыскусію і зварот дзеячоў культуры да Генэральнага сакратара ЦК КПСС Міхаіла Гарбачова.
У гэты дзень памерлі:
1864 – Станіслаў Горскі, беларускі прыродазнавец, мэдык, пэдагог.
1990 – Пімен, патрыярх Маскоўскі і ўсяе Русі.
ЦЫТАТА НА ПАМЯЦЬ
Зусім не хістаюцца слупы, асабліва – глыбока ўкапаныя.
Янка Брыль
ГОД ТАМУ НА САЙЦЕ СВАБОДЫ:
Беларусы забылі пра канстытуцыю 3 траўня
Лявон Вольскі: «У Беларусі сытуацыя агульнанацыянальных Навінак»
Сто галасоў у абарону ўправы БНФ