Лінкі ўнівэрсальнага доступу

1994: Лукашэнка — «вазрадзіцель»


Гэтая карыкатура мае сваю гісторыю.

Улетку 1993 года ў газэце расейскіх камуністаў «Правда» зьявілася інтэрвію з дэпутатам Вярхоўнага Савета Беларусі Аляксандрам Лукашэнкам пад загалоўкам «Да возродится!». Заклік ня тычыўся адраджэньня Беларусі, у якое шмат каму тады верылася. Лукашэнка заклікаў да аднаўленьня імпэрыі — хай пакуль толькі ў выглядзе аб’яднаньня Масквы і Менску.

Быкаў: толькі зьнешні вораг ці ўнутраны здраднік можа выступаць супраць права народа на самавызначэньне

Праз некалькі дзён у «Народнай волі» зьявіўся адказ — артыкул Васіля Быкава пад красамоўнай назвай «Каб захаваць уладу, яны здольныя аб’яднацца хоць з самім д’яблам». " Сувэрэннасьць нацыі і дзяржавы — адна з самых сьвяшчэнных дабротаў супольнага чалавечага існаваньня..., — пісаў Быкаў, — Толькі зьнешні вораг ці ўнутраны здраднік можа ў наш час выступаць супраць права народа на самавызначэньне, на самастойнасьць..."

Быкаў ня быў для Лукашэнкі аўтарытэтам. Праз некалькі тыдняў ён паехаў у Маскву і Дзярждуме Расеі разьвіў тэзісы пра аднаўленьне імпэрыі. Мы, дэпутаты Апазыцыі БНФ, запатрабавалі пазбавіць Лукашэнку і некаторых ягоных паплечнікаў дэпутацкіх паўнамоцтваў. У нас былі спадзяваньні на падтрымку сьпікера Шушкевіча — бо ў тыя дні ў яго абвастрыліся адносіны з прэм’ерам Вячаславам Кебічам, які публічна «пакаяўся» за свой ўдзел у падпісаньні Віскулёўскіх пагадненьняў, але перад самой сэсіяй Станіслаў Станіслававіч і Вячаслаў Францавіч «памірыліся»...

Гэтая карыкатура зьявілася недзе на пачатку 1994 года — калі ўводзілася ў Канстытуцыю прэзыдэнцтва і Кебіч і Лукашэнка пачалі наўздагон агітаваць за ўвядзеньне расейскага рубля ды «самую шчыльную інтэграцыю з Расеяй. Ня памятаю, ці была яна зьмешчаная ў якой-небудзь незалежнай газэце. На жаль, ня ведаю і імя аўтара. Уласна, у той час я ведаў двух майстраў палітычнай карыкатуры. Сяргей Харэўскі зьмяшчаў свае творы ў «Свабодзе» Ігара Гермянчука. Лявонцій Зданевіч (архітэктар, дэпутат Апазыцыі БНФ) свае карыкатуры не друкаваў — але калі ён пускаў іх па сэктарах Авальнай залі, праца парлямэнту была спаралізаваная.

Але Харэўскі і Зданевіч былі, вядома ж, не адзіныя — палітычная карыкатура выходзіла ня толькі ў менскіх, але і ў рэгіянальных незалежных выданьнях. Магчыма, у кагосьці з наведнікаў сайту захаваліся публікацыі?

Ну і, канешне, спадзяемся, што адшукаецца аўтар і гэтага малюнка, які пацьвярджае: задоўга да прэзыдэнцкіх выбараў імпэрскія памкненьні дырэктара саўгасу «Гарадзец» былі відавочныя.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG