У СУБОТУ...
...і нядзелю будзе сонечна, у суботу +14, у нядзелю +18 (халадней стане ў панядзелак).
НЕ ПРАПУСЬЦІЦЕ:
У суботу ў эфіры Свабоды: а) «Гамбурскі рахунак Бахарэвіча» — эсе пра Кузьму Чорнага; б) «Зона Свабоды» — аўдыёзапіс дыскусіі для Белсату, пра сьпіс невязных, галадоўку Сяргея Каваленкі і эўрапейскія эканамічныя санкцыі гавораць Алена Ціхановіч, Франак Вячорка, Юры Дракахруст і Аляксей Знаткевіч.
У нядзелю ў «Праскім акцэнце» Юры Дракахруст разважае на некалькі тэмаў: Якімі могуць быць наступствы забароны на выезд для апазыцыянэраў і грамадзкіх дзеячоў? Якая пазыцыя Расеі ў гэтым пытаньні? Чаму Эўрапарлямэнт адклаў прыняцьцё рэзалюцыі па Беларусі, а краіны Эўразьвязу вырашалі вяртаць сваіх паслоў? У перадачы ўдзельнічаюць кіраўнік гомельскай арганізацыі руху «За Свабоду», блогер Пётар Кузьняцоў, расейскі журналіст Віктар Дзятліковіч і нямецкі палітоляг Марцін Шон.
У ГЭТЫЯ ДНІ Ў БЕЛАРУСІ І Ў СЬВЕЦЕ:
17 – у Менску сэрыя майстар-клясаў у традыцыйных беларускіх танцах. Вядомы этнахарэограф, кіраўнік Любанскага ансамблю «Верабейкі» Сяргей Выскварка навучыць менчукоў і гасьцей сталіцы беларускаму трохкроку, танцам Любаншчыны, распавядзе пра старадаўнія этыкет і манеру выкананьня танцаў. Даведкі можна атрымаць тут.
17-18 – у Менску ў павілёне «БелЭкспа» (вул. Купалы, 27) – міжнародная выстава-кірмаш «Паляўніцтва і рыбацтва. Актыўны адпачынак. Вясна-2012».
17-18 – Менскі раён. На тэрыторыі гісторыка-культурнага цэнтру «Рыцарскі замак» (вёска Астрашыцкі Гарадок) – трынаццаты міжнародны фэстываль «Белы замак». Дэфіле строяў і дасьпехаў, тэматычныя конкурсы, танцы з майстар-клясай, сярэднявечныя гульні і забавы, конны турнір, спаборніцтвы алебардыстаў.
18 – у клюбе «6а» (Менск, пр. Партызанскі, 6а) – зьезд Беларускай сацыял-дэмакратычнай партыі (Грамада), выбары кіраўніцтва партыі і абмеркаваньне ўдзелу ў выбарах. Пачатак у 11.30.
18 – дабрачынны канцэрт «Добрая нядзеля!». Маладой беларускай мастачцы Стасі Майстрэнцы патрэбная дапамога ў барацьбе зь цяжкой хваробай. У Стасі саркома лёгкіх. На канцэрце будуць зьбіраць грошы на лячэньне. У unplugged-фармаце выступяць Руся і CherryVata crew, гурт Sounduk, Паліна Рэспубліка, а таксама гурт BosaeSonca. Канцэрт адбудзецца ў кавярні «Loft» (Менск, вул. Петруся Броўкі 22). Пачатак а 18:00. Тыя ж, хто на канцэрт трапіць ня змогуць, маюць магчымасьць дапамагчы Стасі, пералічыўшы грашовае ахвяраваньне. Падрабязныя зьвесткі дабрачынных рахункаў можна пабачыць тут.
***
Паважаныя наведнікі сайту! Дапамажэце больш поўна прадставіць беларускі дзень — дашлеце інфармацыю пра плянаваныя падзеі, якія будуць цікавыя нашым чытачам, на адрас svaboda@rferl.org.
ТАКСАМА Ў ГЭТЫЯ ДНІ:
17 сакавіка
1861 – расейскі цар Аляксандар ІІ адмяніў прыгоннае права.
1948 – У Брусэлі падпісанае пагадненьне Францыі, Вялікабрытаніі і краінаў Бэнілюксу, якое стала паклала пачаткі НАТА.
1951 – памёр беларускі паэт Альбэрт Паўловіч.
1922 — нарадзіўся Лявон Луцкевіч (1922-1997), грамадска-палітычны і культурны дзеяч, вязень савецкіх канцлагераў.
18 сакавіка
1758 – памёр Тамаш Жаброўскі, беларускі каталіцкі дзяяч, матэматык, архітэктар. Збудаваў касьцёлы сьвятых Пятра і Паўла ў Бабруйску, сьвятых Ігната і Яна ў Вільні, Віленскую абсэрваторыю, езуіцкі калегіюм у Жодзішках.
1921 – падпісаная Рыская мірная дамова паміж Польшчай і Савецкай Расеяй.
1944 – вызвалены Азарыцкі лягер сьмерці.
ЦЫТАТА НА ПАМЯЦЬ:
У маладосьці час і радасны і мілы.
Я повен шчасьця быў: меў шмат здароўя, сілы
І выглядаў, казаць, нішто сабе, прыгожа,
Такі быў час, і быць інакш ня можа.
Альбэрт Паўловіч
ГОД ТАМУ Ў ЗАГАЛОЎКАХ НА САЙЦЕ «СВАБОДЫ»:
Паўстанцы адбілі атаку войскаў Кадафі
Барозу ня хоча бачыць Лукашэнку ў Кіеве
Японія: колькасьць ахвяраў землятрусу перавысіла 5 тысяч