Лінкі ўнівэрсальнага доступу

Украінскі экспэрт: умовы ўтрыманьня Бандарэнкі можна прыраўняць да катаваньняў


Зьміцер Бандарэнка
Зьміцер Бандарэнка
«Сукупнасьць прыведзеных мэдыцынскіх дадзеных сьведчыць пра неабходнасьць правядзеньня для Бандарэнкі мэдыка-сацыяльнай экспэртызы з вызначэньнем ступені страты працаздольнасьці. Тое, што Бандарэнку не даюць карыстацца адмысловымі мэдычнымі рэабілітацыйнымі сродкамі мэдтэхнікі (артапэдычны абутак, мыліцы), можа быць расцэнена як катаваньне і жорсткае абыходжаньне», — лічыць украінскі экспэрт Андрэй Раханскі.

Ва Ўкраіне пацыентам з такім станам здароўя прызначаецца другая група інваліднасьці, адзначае Раханскі.

Ён кажа, што Бандарэнку неабходна выключыць нахілы, сядзеньне, «скручваньне» хрыбетніка; цалкам выключыць падыманьне цяжару, большага за 4 кг; рабіць лячэбную гімнастыку, масаж ног ды іншыя працэдуры.

Раханскі правёў экспэртызу стану здароўя Зьмітра Бандарэнкі і ўмоў ягонага зьняволеньня на падставе мэдычных дакумэнтаў, у тым ліку на падставе эпікрызу апэрацыі на хрыбетніку, піша БелаПАН.

Андрэй Раханскі — юрыст, лекар, кандыдат мэдычных навук, каардынатар грамадзкай арганізацыі «Інстытут прававых дасьледаваньняў і стратэгіяў» (Харкаў, Украіна).

2 сакавіка 2012 году каардынатару кампаніі «Эўрапейская Беларусь», даверанай асобе кандыдата ў прэзыдэнты Андрэя Саньнікава на выбарах-2010 Зьмітру Бандарэнку не далі групу інваліднасьці.

Такое рашэньне прыняла міжведамасная навукова-экспэртная камісія.

7 красавіка 2011 году Бандарэнку асудзілі на 2 гады калёніі агульнага рэжыму пасьля падзеяў 19 сьнежня 2010 году.

У палітыка пасьля арышту дыягнаставалі некалькі грыжаў дыскаў хрыбетніка і ўшчамленьне сьпіннамазгавых нэрваў. 25 ліпеня яго даставілі з Рэспубліканскай турэмнай бальніцы на вуліцы Валадарскага ў 5-ю бальніцу, дзе на наступны дзень зрабілі апэрацыю.

1 лютага Зьміцер Бандарэнка падаў прашэньне пра памілаваньне на імя Аляксандра Лукашэнкі. Пасьля гэтага яму дазволілі карыстацца мыліцамі.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG