Лінкі ўнівэрсальнага доступу

У Смалявіцкім раёне пачынаюць збор подпісаў за мясцовы рэфэрэндум


Сход жыхароў і дачнікаў 10 сакавіка 2012 году.
Сход жыхароў і дачнікаў 10 сакавіка 2012 году.

У Смалявіцкім раёне на Меншчыне мясцовыя дачнікі і жыхары некаторых вёсак працягваюць пратэставаць супраць будаўніцтва беларуска-кітайскага індустрыяльнага парку. Зараз тут пачынаюць рыхтаваць мясцовы рэфэрэндум, каб высьветліць стаўленьне людзей да новабудоўлі.

Ініцыяваць мясцовы рэфэрэндум дачнікі й жыхары Смалявіцкага раёну калектыўна вырашылі на агульным сходзе 10 сакавіка. Наступны этап падрыхтоўкі — збор подпісаў сярод насельніцтва. Вось што паведаміла пра настроі тутэйшых людзей сябра ініцыятыўнай групы Валянціна Каляка:

«Людзі проста так сваю зямлю не аддадуць і кітайцаў сюды ня пусьцяць. Улады пра гэта ведаюць і таму на мапе не вызначаюць канкрэтныя тэрыторыі. Пакуль не паведамляецца, якія вёскі й лецішчы канкрэтна будуць зьнесеныя. А вось калі ўжо прададуць зямлю кітайцам, то нас паставяць перад фактам. І гэтым прымусяць ваяваць нас з кітайцамі...»

Сярод ініцыятараў мясцовага рэфэрэндуму — спадар Леанід. Яго меркаваньне:

«Які вынік будзе атрыманы праз рэфэрэндум — гэта невядома, бо калі ўлады пачнуць праводзіць так званую „прафіляктычную“ агітацыю і даводзіць, што людзі „будуць купацца ў кітайскім золаце“, то многія могуць паддацца на такія ўгаворы. Але калі ўлічыць, што наўрад ці ёсьць цяпер у беларускага й кітайскага боку грошы на гэты праект, то наўрад ці будоўля пачнецца неўзабаве. Відавочна, што пакуль загадзя нічога зносіць ня будуць, верагодна».

Чыноўнікі Смалявіцкага райвыканкаму адмаўляюцца ад якіх-колечы прагнозаў. Кажуць, што ня хочуць гнявіць начальства, бо, да прыкладу, з-за мясцовага канфлікту вызвалены нядаўна ад пасады начальнік аддзелу архітэктуры й будаўніцтва. Акрамя таго, улада актывізуе апрацоўку мясцовага насельніцтва, каб схіліць грамадзкую думку на сваю карысьць. Разважае над падзеямі дэмакратычныя актывістка Віка Раменчык:

«Маё меркаваньне: калі гэтыя людзі адважацца на рэфэрэндум, — гэта нядрэнна для іх. Ужо яны паказалі, што ўяўляюць сілу, бо перад імі чыноўнікі пачалі апраўдвацца, адступаць. А калі людзі пачнуць яшчэ больш кансалідавацца, то гэта будзе найперш, як мне падаецца, нядрэнна для іх жа».
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG