Лінкі ўнівэрсальнага доступу

Эўразьвяз: Не — расстрэлам і катаваньням!


Прадстаўніцтва Эўрапейскага Зьвязу ў Беларусі заклікала беларускія ўлады не прыводзіць у выкананьне сьмяротныя прысуды, вынесеныя асуджаным за тэракт у менскім мэтро Дзьмітрыю Канавалаву і Ўладзіславу Кавалёву.

«Прадстаўніцтва Эўразьвязу нагадвае пра сваё прынцыповае непрыняцьце сьмяротнага пакараньня пры любых абставінах і вельмі шкадуе ў сувязі з вынясеньнем сьмяротных прысудаў Дзьмітрыю Канавалаву і Ўладзіславу Кавалёву. Прадстаўніцтва ЭЗ заклікае ўлады Беларусі не прыводзіць сьмяротныя прысуды ў выкананьне і ўвесьці мараторый на сьмяротнае пакараньне ў якасьці кроку да яго канчатковай адмены», — гаворыцца ў заяве прадстаўніцтва Эўразьвязу ў Менску.

У сёньняшняй заяве таксама адзначаецца, што «прадстаўніцтва ЭЗ глыбока занепакоенае паведамленьнямі пра катаваньні і бесчалавечныя ўмовы ўтрыманьня, якія прымяняюцца ў дачыненьні да палітычных зьняволеных», а таксама тым, што ім адмаўляюць у доступе да адвакатаў і родных.

У сувязі з гэтым прадстаўніцтва Эўразьвязу заклікае ўлады Беларусі прыняць «усе неабходныя заканадаўчыя, адміністрацыйныя, судовыя і іншыя падыходы для поўнага выкананьня сваіх абавязаньняў згодна зь міжнародным правам забясьпечыць поўную забарону катаваньняў, а таксама жорсткага, бесчалавечнага і прыніжальнага абыходжаньня».
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG