Лінкі ўнівэрсальнага доступу

Былых палітвязьняў трымалі да вечара пад наглядам міліцыі


Перад сёньняшняй акцыяй салідарнасьці з палітвязьнямі ў Менску да многіх былых палітвязьняў і актывістаў прыйшлі міліцыянты.

Да былога вязьня Івацэвіцкай калёніі Фёдара Мірзаянава раніцай прыйшлі міліцыянты і павялі без тлумачэньняў у Ленінскі райаддзел міліцыі. Празь некалькі гадзінаў маці Фёдара Мірзаянава ўдалося пагаварыць па тэлефоне з супрацоўнікам райаддзелу, які назваўся Сяргеем Белым. Паводле яго, Фёдар Мірзаянаў выкліканы на допыт у якасьці сьведкі па крымінальнай справе, якая расьсьледуецца ў раёне. Сутнасьць справы міліцыянт не ўдакладніў, як не паведаміў і таго, калі Фёдара адпусьцяць. На момант напісаньня рэпартажу сваякі Мірзаянава паведамлялі, што зьвестак ад яго пра вызваленьне дагэтуль няма.

Сябар Мірзаянава Ільля Васілевіч: «Ягоны дзядзька паведаміў: яго трымаюць у 35-м кабінэце. Дзядзька туды дазваніўся, і яму сказалі, што потым Фёдара адпусьцяць. Але калі — не сказалі. Мяркую, патрымаюць гадзіны да 8-й вечара, каб ня трапіў на акцыю салідарнасьці».

Каля пятай гадзіны дня стала вядома, што Фёдара Мірзаянава зь Ленінскага райаддзелу міліцыі адвезьлі ў шпіталь з галаўным болем. Гэтыя зьвесткі перадалі бацькі былога палітвязьня.

Гэтаксама як і Мірзаянава, раніцай 21 красавіка затрымалі і адвезьлі ў міліцыю актывіста «Эўрапейскай Беларусі» Максіма Вінярскага. Дакладных зьвестак пра тое, дзе трымаюць Вінярскага, няма.

Маці былога палітвязьня Дзьмітрыя Дразда паведаміла, што раніцай да яе прышлі міліцыянты і ўзялі нумар сынавага мабільнага тэлефона. Гісторык Дзьмітрый Дрозд у той момант ужо сышоў з дому — пайшоў працаваць, як звычайна, у архіў, дзе адключае мабільны тэлефон. Маці згадвае, як сына затрымлівалі амаль год таму:
Гэтак жа казалі, каб не баяліся, што выклікаюць толькі на допыт, а потым аказалася, што паўгода мы яго ня бачылі. Мы так напужаліся.

«Гэтак жа казалі, каб не баяліся, што выклікаюць толькі на допыт, а потым аказалася, што паўгода мы яго ня бачылі. Мы так напужаліся. Дзіма званіў, дык казалі яму, каб не ішоў сёньня дамоў начаваць, дзе-небудзь, можа, пераначуе».

21 кастрычніка ў аблозе ў сваёй хаце апынуўся і былы палітвязень Сяргей Казакоў. Напярэдадні ў інтэрнэце Сяргей паведамляў пра пляны прыйсьці на акцыю салідарнасьці. Сёньня раніцай да юнака прыйшлі зь міліцыі, але ён не адчыніў і застаўся ў хаце. З тэлефонных званкоў Сяргей адказваў толькі на знаёмыя нумары, паведаміла маці вязьня Ганна Крупко:

«Вось я размаўляла зь ім паўгадзіны таму. Ён сказаў, што ўжо сышлі міліцыянты, але ён на працу так і не пайшоў».

Пазьней у інтэрнэце Сяргей Казакоў напісаў, што, на ягоную думку, міліцыянты не сышлі, а проста схаваліся, каб іх не было відаць праз вочка ў дзьвярах.

Жонка экс-кандыдата на прэзыдэнта Андрэя Саньнікава журналістка Ірына Халіп паведаміла, што ёй сёньня міліцыянты пакуль не заміналі, але што адбудзецца бліжэй да 19-й гадзіны, яна прадказаць ня можа:

«Напярэдадні Народнага сходу міліцыянты прыходзілі, а цяпер пакуль нікога не было».

Ірына Халіп атрымала першы ліст ад мужа, напісаны ўжо з ПКТ калёніі ў Бабруйску, куды Андрэя Саньнікава зьмясьцілі пасьля карантыну. Экс-кандыдата на прэзыдэнта ўтрымліваюць у адзіночнай камэры, дзе звычайна трымаюць злосных парушальнікаў турэмнага рэжыму, хоць зьвестак пра тое, каб Саньнікаў нешта парушыў, няма.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG