Лінкі ўнівэрсальнага доступу

Ермакова: Крэдыту МВФ можа і ня быць, бо палітвязьні ня хочуць выходзіць


Надзея Ермакова
Надзея Ермакова
Беларусь сёньня вярнулася да рынкавага фармаваньня курсу нацыянальнай валюты. На міжбанкаўскай валютна-фондавай біржы скасаваныя таргі па ільготным курсе для імпартэраў энэрганосьбітаў і мэдыкамэнтаў. На біржы засталася толькі рынкавая сэсія, па выніках якой сфармаваны афіцыйны курс беларускага рубля: 8680 — да даляра, 11900 — да эўра, 277 — да расейскага рубля.

Старшыня праўленьня Нацбанку Беларусі Надзея Ермакова з нагоды пераходу на рынкавы курс паведаміла, што дэвальвацыя нацыянальнай валюты з пачатку году склала 189 працэнтаў. Спадарыня Ермакова заявіла, што ад сёньня Нацбанк перайшоў да рэжыму «кіраванага плаваньня» курсу і спадзяецца на ўмацаваньне рубля, да 7–8 тысяч рублёў за даляр на канец году.

Пад ціскам фінансавага крызісу ўлады былі вымушаныя вярнуцца да рынкавых мэханізмаў. Чаму гэтага не зрабілі ў красавіку? Адказ Надзеі Ермаковай:

«Напэўна, не былі гатовыя псыхалягічна, не была гатовая аснова для таго, каб гэта зрабіць. Нават калі ўзяць з красавіка, то шмат яшчэ было выдадзена эмісійных крэдытаў. А пасьля таго, калі было ўхваленае рашэньне пра выхад на адзіны курс і ўзмацненьне жорсткасьці грашова-крэдытнай палітыкі, эмісія Нацбанкам была спыненая ў чэрвені… Чаму не прынялі ў красавіку? Ну, не прынялі й не прынялі».
Чаму не прынялі ў красавіку? Ну, не прынялі й не прынялі.

Пераход на рынкавыя прынцыпы даўся нялёгка, прызнала спадарыня Ермакова:

«Гэта ж вельмі сур’ёзнае рашэньне — спыніць фінансаваньне тых дзяржаўных праграм, якія ўжо пачатыя, спыніць фінансаваньне будаўніцтва жыльля, калі дамы ўжо пабудаваныя да паловы. Гэта ж усё былі эмісійныя крэдыты».

Колькі страціла беларуская эканоміка ад такой палітыкі, Надзея Ермакова сказаць не змагла — маўляў, гэта палічыць складана, таксама як маральныя страты і страты іміджу.

Паводле Надзеі Ермаковай, цяпер у Беларусі, напэўна, давядзецца прыпыніць жыльлёвыя праграмы на некалькі гадоў:

«Пры цяперашніх стаўках не зусім зручна і нават не зусім рэальна крэдытаваць жыльлё. Нічога страшнага не адбудзецца, калі мы год-два пацерпім і ня будзем разьвіваць жыльлёвае будаўніцтва. Напэўна, сур’ёзна давядзецца прыпыніць жыльлёвыя праграмы»

Кіраўніца Нацбанку таксама паведаміла, што да канца гэтага году будзе павышаны кошт жыльлёва-камунальных паслуг для насельніцтва.

Больш дэталяў з прэсавай канфэрэнцыі ТУТ.


Былы старшыня Нацбанку Станіслаў Багданкевіч лічыць мэханізм курсаўтварэньня, на які перайшлі ўлады, сапраўды рынкавым, адміністратыўнае ўмяшаньне ў яго мінімальнае. На яго думку, гэта трэба было б зрабіць раней, а так за мінулыя паўгода краіна панесла сапраўды значныя страты:

Станіслаў Багданкевіч
«Я мяркую, былі вялізныя страты, страты на спажывецкім рынку, страты на валютным рынку, абясцэньваньне ўкладаў насельніцтва, банкаўскіх актываў, актываў малога, сярэдняга і буйнога бізнэсу. Гэта ўсё вялізныя страты. У банках нарматыўны капітал рэзка зьнізіўся на мільярды, і шмат якія банкі апынуліся на мяжы выжываньня».

Калі б такую палітыку, як цяпер, павялі ў красавіку, то курс беларускага рубля да даляра складаў бы не 8600, а каля 5 тысяч, перакананы Станіслаў Багданкевіч:

«Калі б не сядзелі ўсе пад венікам, калі б рабілі захады, калі б своечасова распрацавалі сыстэмную комплексную праграму і разьвіцьця канкурэнцыі, і неўмяшаньня адміністратыўнага ў бізнэс, і абмежаваньня дзяржвыдаткаў…»

Дзейны старшыня Нацбанку Надзея Ермакова адказала і на пытаньне пра тое, калі Беларусь зможа выканаць умовы МВФ, каб пачаць перамовы пра новы крэдыт ад гэтай арганізацыі:

«Магчыма, яго і ня будзе. Нават хутчэй за ўсё. Бо нават калі мы ўсе сто працэнтаў патрабаваньняў выканаем, палітычныя моманты застаюцца. І гэта, выяўляецца, самы галоўны фактар ва ўзаемаадносінах з МВФ. Ня з той місіяй, якая ў нас была, а з дырэктарамі ад тых краін, якія сёньня ў Беларусі бачаць больш палітыку, чым эканоміку і партнэрства».

Надзея Ермакова ўдакладніла, што маецца на ўвазе вызваленьне палітвязьняў, чаго дамагаецца значная частка Рады дырэктараў МВФ:

«Гэта і сёньня не хаваецца, і той місіяй МВФ, якая была папярэдняй і нам пісала заключэньне, там таксама праходзіла ў першым абзацы пра выпуск зьняволеных. Гэта канкрэтная інфармацыя, якая нідзе не хаваецца, пра тое, што трэба выпускаць палітзьняволеных… А яны ня хочуць выходзіць».



Гл.таксама камэнтары: дырэктара Агенцтва дзелавых сувязяў Валянціна Лопана, супрацоўніка дасьледчай групы Business Forecast.by Аляксандра Мухі, старшыні клюбу фінансавых дырэктараў Андрэя Карпуніна.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG