Лінкі ўнівэрсальнага доступу

Старшыня Эўрапарлямэнту асуджае ціск на грамадзянскую супольнасьць Беларусі


Будынак Эўрапарлямэнту ў Брусэлі
Рычард Фрыдман, прэсавы сакратар старшыні Эўрапарлямэнту Ежы Бузэка, пракамэнтаваў для Радыё Свабода зьмены ў беларускім заканадаўстве, зьвязаныя з замежным фінансаваньнем партыяў і грамадзкіх арганізацыяў, і пашырэньнем паўнамоцтваў КДБ.

Фрыдман: Старшыня Эўрапарлямэнту Ежы Бузэк цалкам асуджае апошнія захады беларускіх уладаў супраць недзяржаўных арганізацыі і грамадзянскай супольнасьці. Гэтыя зьмены пашыраюць паўнамоцтвы КДБ па-за ўсе разумныя межы. Цяперашні закон аб недзяржаўных арганізацыях адзін зь нямногіх законаў, які можа даць падтрымку грамадзянскай супольнасьці. Любы далейшы ціск на грамадзянскую супольнасьць абсалютна непрымальны, і старшыня Эўрапарлямэнту Ежы Бузэк асуджае такія крокі.

Карэспандэнт: Як вы лічыце, ці будуць новыя захады з боку Эўрапарлямэнту? Ужо быў шэраг рэзалюцыяў з асуджэньнем беларускіх уладаў, ці будуць новыя?

Фрыдман: Так, вядома ж. Эўрапарлямэнт пасьлядоўна асуджае парушэньні правоў чалавека ў Беларусі і заўсёды заклікаў да вызваленьня ўсіх палітвязьняў, якія застаюцца ў зьняволеньні ў Беларусі. Некалькі разоў мы запрашалі прадстаўнікоў беларускай апазыцыі. Я магу прадбачыць, што камітэт у замежных пытаньнях Эўрапарлямэнту і агулам Эўрапарлямэнт будуць разглядаць пытаньне правоў чалавека ў Беларусі і прымуць рэзалюцыі з заклікам да краінаў Эўразьвязу і іх урадаў прыняць далейшыя захады супраць беларускіх уладаў. Іх дзеяньні гэта адназначна крок у няверным кірунку і іх нельга талераваць.

Карэспандэнт: Наколькі верагодна, што ўжо будзе нейкая рэакцыя на наступным пленарным паседжаньні Эўрапарлямэнту ў кастрычніку?

Фрыдман: Гэта залежыць ад палітычных груповак і пытаньняў на парадку дня пленарнага паседжаньня. Але я ўпэўнены, што гэтае пытаньне будзе сярод прыярытэтаў на парадку дня Камітэту ў правах чалавека і Камітэту ў замежных справах Эўрапарлямэнту. Я ўжо казаў, што яны вельмі пасьлядоўна выступаюць з асуджэньнем парушэньні правоў чалавека і недахоп свабодных і справядлівых выбараў у Беларусі. Мы яшчэ пабачым, ці адбудзецца гэта ў кастрычніку, ці ў лістападзе, але відавочна, што Эўрапарлямэнт зойме жорсткую пазыцыю адносна любога далейшага ціску на грамадзянскую супольнасьць Беларусі, якая абсалютна падставовая для эфэктыўнага функцыянаваньня дэмакратыі.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG