Уладзімер Палажанка: Дзе Дашкевіч?

Бацька Насты Плажанкі вядзе пошукі лідэра Маладога Фронту Зьмітра Дашкевіча, якога ў панядзелак вывезьлі з Горацкай калёніі.

Уладзімер Палажанка: "Пакуль нам толькі вядома, што ў панядзелак Зьміцера Дашкевіча перавялі з калёніі і вывезьлі ў Магілёўскі сьледчы ізалятар для этапаваньня ў іншае месца. Сёньня - чацьвёрты дзень, і ніякай інфармацыі пра Дашкевіча няма. Дэпартамэнт выкананьня пакараньняў МУС спасылаецца на тое, што іх ведамасныя інструкцыі на пэрыяд этапаваньня забараняюць даваць якую-небудзь інфармацыю. Пракуратура таксама маўчыць. І мы сур'ёзна занепакоены: дзе Зьміцер? Беларусь - краіна невялікая, тут цягам 3-4 гадзін можна чалавека перавезьці ў якую заўгодна кропку, ну хай за дзень - а тут 4 дні пра чалавека нічога не вядома. Ён проста зьнік. Мы занепакоеныя тым, што ў яго былі нацягнутыя адносіны з адміністрацыяй калёніі, што і было прычынай пераводу ў іншае завядзеньне. Мы ведаем, што ён апошнія сем дзён, да этапу, трымаў галадоўку. Ці спыніў ён яе? Ці патрэбная яму мэдычная дапамога?

Калі Зьміцера перавозілі на этап у Жодзіна, потым у Горкі, ён перадаў нам зімовую вопратку (таму што было лета), і ў яго сёньня - толькі лёгкае летняе адзеньне. Мы спрабавалі апошнія дні, у канцы жніўня, перадаць яму цёплыя рэчы, аднак пад рознымі адгаворкамі - што ён у ізалятары, што ён будзе этапіраваны - нам адмаўлялі ў прыёме перадачы. І на сёньня мы ведаем толькі адно: адзеньне ў яго летняе, а ночы - халодныя.

Насьця сёньня таксама арыштаваная і ўтрымліваецца на Акрэсьціна. Арыштаваная па надуманай нагодзе, таму што яна знаходзілася на плошчы ў той час, як яе знаёмага затрымалі на плошчы з намерам вывесіць сьцяг. Удзел яе ня быў даказаны. Суд ніякія аргумэнты не прывняў. Зараз адвакат падрыхтавала скаргу на дзеяньні судовых ворганаў і міліцыі".