Ад лідэра «Маладога фронту» Зьмітра Дашкевіча дайшоў на волю першы за месяц ліст. Дзьмітрыя Бандарэнку паабяцалі адправіць у магілёўскую калёнію,— нягледзячы на ягоны цяжкі пасьляапэрацыйны стан. Знайшоўся пашпарт Міколы Статкевіча. Эдуард Лобаў напісаў, што ня будзе падаваць прашэньня аб памілаваньні. Былы вязень Уладзімер Хамічэнка стаў на ўлік у міліцыі ў Слуцку, паведамляюць афіцыйныя структуры.
Маці палівязьня Эдуарда Лобава Марына атрымала ад Зьмітра Дашкевіча ліст. Гэта першая вестка ад яго за больш як месяц. Раней Дашкевіча пакаралі карцэрам, а потым не пускалі да яго адвакатаў, лісты ад вязьня не даходзілі. Марына Лобава паведаміла пра Дашкевіча:
«Піша, што цяпер ён знаходзіцца, як Мікіта Ліхавід, у ПКТ — гэта памяшканьне камэрнага тыпу. Зьмясьцілі яго туды на месяц, а потым будуць вырашаць паводле абставінаў. А наконт таго, за што яго пакаралі карцэрам, не напісаў. Раней я пыталася ў яго, ці, можа, ідзе які ціск на яго ў сувязі з прашэньнямі аб памілаваньні, дык ён напісаў толькі, што ніколі ня будзе пісаць такога прашэньня. Што ён узяў на сябе гэты крыж і адмаўляцца ад яго, здраджваць сваім прынцыпам ня будзе».
Зьмітра Бандарэнку неўзабаве могуць перавесьці з «Валадаркі» ў магілёўскую калёнію № 15, паведаміла жонка вязьня Вольга Бандарэнка са спасылкай на турэмнага лекара. Лекар запэўніў Вольгу Бандарэнку, што пры канваяваньні міліцыянты ўлічаць ягоны стан:
«Адзінае добрае, што сказаў, што будуць перавозіць яго ў ляжачым стане. Гэта мяне крыху супакоіла, бо за этапаваньне я вельмі перажываю».
Паводле рэкамэндацыі мэдыкаў з 5-га гарадзкога шпіталя, Зьмітру Бандарэнку пасьля апэрацыі патрэбная рэабілітацыя цягам ня менш як 6 месяцаў. Між тым вязьня зьбіраюцца накіраваць у калёнію, дзе паўнавартасная рэабілітацыя немагчымая.
У шклоўскую калёнію, дзе трымаюць экс-кандыдата на прэзыдэнта Мікалая Статкевіча, нарэшце даслалі ягоны пашпарт. Жонка вязьня Марына Адамовіч кажа, што зьвестак пра тое, дзе знаходзіцца пашпарт Статкевіча, не было з часу суду над палітыкам. Марына Адамовіч накіравала некалькі скаргаў адносна пашпарта Статкевіча:
«Гэта Ленінскі раённы суд адправіў прысуд у калёнію, а пашпарт чамусьці на „Валадарку“. Але лёгіку гэтага кроку зразумець немагчыма. Я тлумачу гэта тым, што хацелі яшчэ болей зрабіць непрыемнасьцяў для вязьня».
Маці палітвязьня Аляксандра Класкоўскага Людміла Класкоўская турбуецца, што даўно не было лістоў ад сына, якога трымаюць у калёніі ў Шклове разам зь Мікалаем Статкевічам:
«Ужо паўтара месяца няма ад яго лістоў. Кожны дзень я яму пішу, а адказу няма. Чакала, што, можа, вызваляць яго паводле памілаваньня, спадзявалася, хоць ведала, што ён адмаўляўся падпісваць прашэньне, казаў раней, што „ня будзе нічога прасіць у гэтай улады“. Пазваніла сёньня ў калёнію з пытаньнем, чаму лістоў ад яго няма — адказалі, што ня ведаюць».
Актывіст «Маладога фронту» Эдуард Лобаў, асуджаны на 4 гады зьняволеньня паводле артыкула аб хуліганстве — за бойку, якую нібыта ўчыніў за дзень да выбараў, — напісаў маці, што не зьбіраецца падаваць прашэньне аб памілаваньні.
Тым часам з афіцыйных крыніцаў стала вядома, што 9-ы памілаваны Лукашэнкам, Уладзімер Хамічэнка, стаў на ўлік у міліцыі Слуцку, дзе яму прапанавалі працаўладкавацца і паабяцалі аказаць садзеяньне ў атрыманьні працоўнай спэцыяльнасьці.
Адразу пасьля падзей 19 сьнежня ў інтэрнэце Хамічэнка атрымаў мянушку «навушнік» з-за таго, што нібыта на ганку Дома ўраду перагаворваўся з кімсьці праз адмысловае прыстасаваньне. У судзе падазрэньні ў тым, што Хамічэнка быў правакатарам, не пацьвердзіліся. Зьвязацца з Уладзімерам Хамічэнкам пасьля ягонага выхаду на волю не ўдаецца.
Маці палівязьня Эдуарда Лобава Марына атрымала ад Зьмітра Дашкевіча ліст. Гэта першая вестка ад яго за больш як месяц. Раней Дашкевіча пакаралі карцэрам, а потым не пускалі да яго адвакатаў, лісты ад вязьня не даходзілі. Марына Лобава паведаміла пра Дашкевіча:
«Піша, што цяпер ён знаходзіцца, як Мікіта Ліхавід, у ПКТ — гэта памяшканьне камэрнага тыпу. Зьмясьцілі яго туды на месяц, а потым будуць вырашаць паводле абставінаў. А наконт таго, за што яго пакаралі карцэрам, не напісаў. Раней я пыталася ў яго, ці, можа, ідзе які ціск на яго ў сувязі з прашэньнямі аб памілаваньні, дык ён напісаў толькі, што ніколі ня будзе пісаць такога прашэньня. Што ён узяў на сябе гэты крыж і адмаўляцца ад яго, здраджваць сваім прынцыпам ня будзе».
Зьмітра Бандарэнку неўзабаве могуць перавесьці з «Валадаркі» ў магілёўскую калёнію № 15, паведаміла жонка вязьня Вольга Бандарэнка са спасылкай на турэмнага лекара. Лекар запэўніў Вольгу Бандарэнку, што пры канваяваньні міліцыянты ўлічаць ягоны стан:
«Адзінае добрае, што сказаў, што будуць перавозіць яго ў ляжачым стане. Гэта мяне крыху супакоіла, бо за этапаваньне я вельмі перажываю».
Паводле рэкамэндацыі мэдыкаў з 5-га гарадзкога шпіталя, Зьмітру Бандарэнку пасьля апэрацыі патрэбная рэабілітацыя цягам ня менш як 6 месяцаў. Між тым вязьня зьбіраюцца накіраваць у калёнію, дзе паўнавартасная рэабілітацыя немагчымая.
У шклоўскую калёнію, дзе трымаюць экс-кандыдата на прэзыдэнта Мікалая Статкевіча, нарэшце даслалі ягоны пашпарт. Жонка вязьня Марына Адамовіч кажа, што зьвестак пра тое, дзе знаходзіцца пашпарт Статкевіча, не было з часу суду над палітыкам. Марына Адамовіч накіравала некалькі скаргаў адносна пашпарта Статкевіча:
«Гэта Ленінскі раённы суд адправіў прысуд у калёнію, а пашпарт чамусьці на „Валадарку“. Але лёгіку гэтага кроку зразумець немагчыма. Я тлумачу гэта тым, што хацелі яшчэ болей зрабіць непрыемнасьцяў для вязьня».
Маці палітвязьня Аляксандра Класкоўскага Людміла Класкоўская турбуецца, што даўно не было лістоў ад сына, якога трымаюць у калёніі ў Шклове разам зь Мікалаем Статкевічам:
«Ужо паўтара месяца няма ад яго лістоў. Кожны дзень я яму пішу, а адказу няма. Чакала, што, можа, вызваляць яго паводле памілаваньня, спадзявалася, хоць ведала, што ён адмаўляўся падпісваць прашэньне, казаў раней, што „ня будзе нічога прасіць у гэтай улады“. Пазваніла сёньня ў калёнію з пытаньнем, чаму лістоў ад яго няма — адказалі, што ня ведаюць».
Актывіст «Маладога фронту» Эдуард Лобаў, асуджаны на 4 гады зьняволеньня паводле артыкула аб хуліганстве — за бойку, якую нібыта ўчыніў за дзень да выбараў, — напісаў маці, што не зьбіраецца падаваць прашэньне аб памілаваньні.
Тым часам з афіцыйных крыніцаў стала вядома, што 9-ы памілаваны Лукашэнкам, Уладзімер Хамічэнка, стаў на ўлік у міліцыі Слуцку, дзе яму прапанавалі працаўладкавацца і паабяцалі аказаць садзеяньне ў атрыманьні працоўнай спэцыяльнасьці.
Адразу пасьля падзей 19 сьнежня ў інтэрнэце Хамічэнка атрымаў мянушку «навушнік» з-за таго, што нібыта на ганку Дома ўраду перагаворваўся з кімсьці праз адмысловае прыстасаваньне. У судзе падазрэньні ў тым, што Хамічэнка быў правакатарам, не пацьвердзіліся. Зьвязацца з Уладзімерам Хамічэнкам пасьля ягонага выхаду на волю не ўдаецца.