Лінкі ўнівэрсальнага доступу

Лісты з калёніі ад Аляксандра Класкоўскага ідуць па 12 дзён


Аляксандар Класкоўскі
Карэспандэнцыя Аляксандра Класкоўскага, асуджанага па справе аб масавых беспарадках у Менску 19 сьнежня, даходзіць з калёніі ў Шклове выбарачна і са спазьненьнем. Пра гэта агенцтву БелаПАН паведаміў яго бацька, журналіст Аляксандар Класкоўскі.

"Я атрымаў ад яго ліст 25 ліпеня. Мяркуючы па лісьце, Аляксандар пісаў яго ў ноч з 12 на 13 ліпеня, штэмпэль на пошце пазначаны 23 ліпеня. Такім чынам, дзён дзесяць ліст знаходзіўся невядома дзе", — сказаў Класкоўскі-старэйшы.

Ён таксама паведаміў, што за апошнія некалькі дзён лісты са шклоўскай калёніі атрымалі яго дачка і Марына Адамовіч, грамадзянская жонка экс-кандыдата ў прэзыдэнты Мікалая Статкевіча (Класкоўскі і Статкевіч праходзілі па адной крымінальнай справе. — БелаПАН.) "Характэрна, што лісты прыйшлі пасьля таго, як трывогу з-за іх адсутнасьці ўзьнялі СМІ, а я пазваніў нампаліту ў калёнію", — заўважыў бацька асуджанага.

Класкоўскі таксама мяркуе, што выпісаныя газэты да Аляксандра не даходзяць. "Хутчэй за ўсё, вакол сына ствараюць інфармацыйную блякаду — такое было і ў СІЗА КДБ. Свае лісты Аляксандар піша вельмі асьцярожна. Па іх можна меркаваць, што спачатку ў калёніі стаўленьне было больш ляяльнае. Затым, відаць, пасьля каманды з гары стаўленьне зрабілася больш жорсткім, ён ня можа пазваніць сваякам", — сказаў журналіст.

У сваім лісьце Аляксандар Класкоўскі адзначае праблему з карэспандэнцыяй як найбольш актуальную. Ён выказаў надзею на тое, што "пасьля разгляду касацыйнай скаргі стане звычайным зьняволеным і зможа ўбачыцца з жонкай і малодшым сынам".

26 траўня суд Ленінскага раёну Менску прызнаў Аляксандра Класкоўскага вінаватым па трох артыкулах Крымінальнага кодэксу: арганізацыя масавых беспарадкаў і ўдзел у іх; зьнявага прадстаўніка ўлады; самавольнае прысваеньне званьня або ўлады службовай асобы. Яму прысудзілі пяць гадоў пазбаўленьня волі ў калёніі ўзмоцненага рэжыму. 19 ліпеня Менскі гарадзкі суд разгледзеў касацыйную скаргу Класкоўскага, пакінуўшы прысуд безь зьмяненьняў.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG