Лінкі ўнівэрсальнага доступу

Магілёў: Маладафронтаўца звольнілі з працы


Магілёўскі актывіст зарэгістраванай у Чэхіі грамадзкай арганізацыі "Малады фронт" Валянцін Лабачоў застаўся бяз працы. Учора хлопец выйшаў на волю пасьля 12 сутак адміністрацыйнага арышту, а сёньня даведаўся, што звольнены.

Адпрацаваць на прыватным кравецкім прадпрыемстве актывіст пасьпеў толькі тры дні. 6 ліпеня яго затрымалі непадалёк ад месца, дзе ў Магілёве традыцыйна праходзяць маўклівыя акцыі пратэсту. Сёмага ліпеня судзьдзя Ленінскага суду Станіслаў Шандаровіч пакараў актывіста за нібыта ўдзел у несанкцыянаваным мерапрыемстве.

"Я рабіў рознарабочым. Кіраўнік прадпрыемства нават не пасьпеў выдаць загад аб маім уладкаваньні, як мяне пасадзілі. Пакуль я знаходзіўся ў ізалятары, мне знайшлі замену. Без праблемаў сёньня выплацілі заробак за тры дні. Ні на кога я не наракаю. Гэта прадпрыемства, і яно павінна працаваць. Буду думаць, куды ўладкавацца на працу зноў. Падумваю вучыцца", пракамэнтаваў сваё звальненьне Валянцін Лабачоў.

Ні на кога я не наракаю. Гэта прадпрыемства, і яно павінна працаваць. Буду думаць, куды ўладкавацца на працу зноў. Падумваю вучыцца

18 ліпеня звольнілі з працы яшчэ аднаго вязьня магілёўскага ізалятара часовага ўтрыманьня Аляксандра Цалюка. У няволі хлопец больш за трое сутак галадаў на знак пратэсту супраць незаконнага затрыманьня. Не даседзеўшы тэрміну, атрыманага ад таго ж судзьдзі Шандаровіча, Цалюк страціў прытомнасьць, і яго завезьлі ў шпіталь. Пасьля выпіскі міліцыянты адмовіліся даваць даведку вязьню, што ён знаходзіўся ў ізалятары. Сказалі, што трэба даседзець увесь тэрмін. Кіраўніцтва прадпрыемства, дзе працаваў Цалюк, без даведкі зьняволеньне палічыла за прагул. Зь пяці сутак арышту хлопец адседзеў чатыры.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG