Лінкі ўнівэрсальнага доступу

Маці палітвязьня Лобава пакаралі за акцыю 3 ліпеня


Маці палітвязьня Эдуарда Лобава Марына 3 ліпеня зазнала малую частку таго, праз што праходзяць у беларускіх турмах яе сын і іншыя палітвязьні. Яе затрымалі ў часе разгону «маўклівай акцыі» ў Менску. Тым часам палітвязьня Дзьмітрыя Вуса паклалі ў турэмны шпіталь, а Зьміцер Бандарэнка напісаў, што можа пагадзіцца на апэрацыю ў турме.

Актывіст «Маладога фронту» Эдуард Лобаў, які адбывае прысуджаныя яму 4 гады зьняволеньня ў Івацэвіцкай калёніі, ужо амаль месяц ня піша дамоў. Маці палітвязьня Марына Лобава непакоіцца, што зь ім магло нешта здарыцца, бо раней такіх вялікіх перапынкаў у ліставаньні не было. Марыну Лобаву затрымалі разам з малодшым непаўналетнім сынам 3 ліпеня падчас акцыі маўклівага пратэсту на Прывакзальнай плошчы, ноч яна адбыла на Акрэсьціна, а 4 ліпеня ёй прысудзілі за «дробнае хуліганства» штраф памерам 20 базавых велічынь. Пра перажытае падчас затрыманьня і суду Марына Лобава кажа, што «быццам зазірнула ў тое, праз што даводзіцца прайсьці палітвязьням». Жанчына згадвае грубасьць асобных супрацоўнікаў міліцыі, надзвычай дрэнныя бытавыя ўмовы на Акрэсьціна, залежнасьць судоў ад уладаў. Але ёсьць у Марыны Лобавай і станоўчыя ўспаміны. Вось як маці палітвязьня згадвае пра адзін з момантаў у Маскоўскім РУУС:
Мы сядзелі там у нейкай актавай залі, чалавек 50 нас было, і ўсе пачалі бурна апладзіраваць. Міліцыянты проста ня ведалі, што з намі рабіць.

«І вось аб 11 гадзіне, калі меўся быць салют, мы сядзелі там у нейкай актавай залі, чалавек 50 нас было, і ўсе пачалі бурна апладзіраваць. Міліцыянты проста ня ведалі, што з намі рабіць. Мы ж ужо затрыманыя, нас болей не пакараеш. Людзі не баяліся, гэта было цудоўна».

Былога кандыдата ў прэзыдэнты Дзьмітрыя Вуса, асуджанага на 5,5 года калёніі ўзмоцненага рэжыму, паклалі ў Рэспубліканскі турэмны шпіталь.

Першым пра гэта паведаміў у лісьце сваёй жонцы палітвязень Зьміцер Бандарэнка, які сам цяпер ляжыць у шпіталі. Там ён бачыў Вуса і размаўляў зь ім. Афіцыйна гэтую інфармацыю пацьвердзілі Вусавай жонцы Яўгеніі ў адміністрацыі турмы на Валадарцы.

Некалькі гадоў таму Дзьмітрый Вус перанёс цяжкую апэрацыю, шмат дзён праляжаў у коме. Пасьля гэтага Вусу прызначылі 2-ю групу інваліднасьці, якую ён ня стаў пацьвярджаць напярэдадні выбараў.

На дадзены момант дакладных зьвестак пра стан здароўя Дзьмітрыя Вуса няма. Вольга Бандарэнка, якая спасылаецца на ліст свайго мужа, кажа:

«Дзіма наўпрост пра гэта не напісаў. Відаць, баючыся цэнзуры, бо пісаць пра тое, з кім сядзіш, забаронена. Раней, вядома, у Вуса быў інсульт. Але мяркуючы па тым, што яны размаўлялі, — магчыма, ня ўсё гэтак трагічна».

Пра сябе Зьміцер Бандарэнка паведаміў жонцы, што, магчыма, будзе пагаджацца на апэрацыю ў турэмных умовах.

Ужо вядомы дзень разгляду касацыйнай скаргі Зьмітра Бандарэнкі:

«Касацыя ў нас прызначаная на 15 ліпеня. Яна была прызначаная на 1 ліпеня, але перанесеная на 15-га. Дзіма ўжо і расьпісаўся, што ведае пра перанос».

15 ліпеня таксама будзе разгледжаная касацыйная скарга экс-кандыдата на прэзыдэнта Андрэя Саньнікава і тых, каго судзілі разам зь ім. Сярод іх быў моладзевы актывіст Фёдар Мірзаянаў. Маці Фёдара Людміла Мірзаянава паведаміла, што ў лісьце дамоў сын падтрымаў думку іншых вядомых палітвязьняў, што Эўропе нельга таргавацца зь беларускім рэжымам аб вызваленьні палітвязьняў, прапануючы крэдыты. 4 ліпеня зь Фёдарам Мірзаянавым на «Валадарцы» сустрэлася ягоная адвакатка Тамара Сідарэнка. Пра сябе Фёдар паведаміў, што ў той жа дзень будзе падаваць заяву аб пераводзе з «Валадаркі» ў калёнію:

«Ён сказаў адвакату: я ўжо падам заяву. А этап, паводле ліста, меўся быць 10-га. Але праз адваката Фёдар перадаў, што этап можа быць і раней».

Эдуард Лобаў


Эдуард Лобаў
Нарадзіўся ў Менску ў 1988 г. З 8-га кляса марыў зьвязаць сваё жыцьцё з войскам. Служыў тэрміновую службу ў спэцназе. Тамсама, у войску, пазнаёміўся з маладафронтаўцам з Гомелю, дзякуючы якому далучыўся да "Маладога фронту". Быў абраны кіраўніком менскай гарадзкой арганізацыі МФ. Надалей цікавіцца ваеннай справай і марыць пра адраджэньне беларускага войска.

Затрыманы 18 сьнежня разам зь лідэрам МФ Зьмітром Дашкевічам, абвінавачаны ў хуліганстве. У Жодзінскім СІЗА за адмову сьведчыць супраць маладафронтаўцаў Эдуарда пагражалі перавесьці ў камэру, дзе зь ім жорстка расправяцца.

Дзьмітры Вус

Дзьмітры Вус
Нарадзіўся ў 1971 годзе ў Менску.

Юрыст, завочна скончыў Гарадзенскі ўнівэрсытэт па спэцыяльнасьці «Правазнаўства».

З 16 гадоў працаваў рабочым на заводзе «Інтэграл», пасьля будаўніком.

1999–2003 гг. Дэпутат Менскага гарсавету дэпутатаў.

2007 г. Таксама ішоў на дэпутата, але яго не зарэгістравалі.

2008 г. Вылучаўся на дэпутата ў Палату прадстаўнікоў.

2010 г. Удзельнічаў у мясцовых выбарах, але не прайшоў у Менгарсавет.

Ачольвае выдавецтва «Трывіюм».

Жанаты, мае двух сыноў.

Беспартыйны.

Зьміцер Бандарэнка

Зьміцер Бандарэнка
Грамадзкі актывіст, сябра ГА «БАЖ». Нарадзіўся ў Менску 28 верасьня 1963 году.

У 1984 г. скончыў Інстытут фізычнай культуры.

У 1995–1996 гг. працаваў на незалежным Радыё 101.2 FM, зачыненым уладамі.

Адзін з заснавальнікаў грамадзянскай ініцыятывы «Хартыя-97», каардынатар грамадзянскай кампаніі «Эўрапейская Беларусь».

У часе прэзыдэнцкіх выбараў 2010 г. быў актывістам штабу кандыдата на прэзыдэнта Андрэя Саньнікава. Быў арыштаваны 20 сьнежня ва ўласнай кватэры і зьмешчаны ў СІЗА КДБ. Першапачаткова ў дачыненьні да яго было высунутае абвінавачваньне па арт. 293 КК (масавыя непарадкі), які прадугледжвае пакараньне да 15 гадоў пазбаўленьня волі, аднак 4 красавіка яно было перакваліфікавана на больш мяккае.

Зьміцер Бандарэнка абвінавачваецца па ч. 1 артыкулу 342 Крымінальнага кодэксу (арганізацыя і падрыхтоўка дзеяньняў, што груба парушаюць грамадзкі парадак, альбо актыўны ўдзел у іх). Артыкул прадугледжвае пакараньне штрафам, або арыштам на тэрмін да шасьці месяцаў, ці абмежаваньнем волі на тэрмін да трох гадоў, або пазбаўленьнем волі на той жа тэрмін.

Фёдар Мірзаянаў

Фёдар Мірзаянаў
Нарадзіўся у 1990 годзе ў Баранавічах. У 2008 г. паступіў на факультэт мэнэджмэнту Беларускага дзяржаўнага эканамічнага ўнівэрсытэту па спэцыяльнасьці «эканамічная кібэрнэтыка».

Падчас выбарчай кампаніі быў у камандзе кандыдата ў прэзыдэнты Яраслава Раманчука.

Пасьля падзеяў 19 сьнежня адбыў 15 сутак адміністратыўнага арышту ў сьледчым ізалятары Жодзіна.

Пасьля арышту 25 студзеня 2011 г. яму было высунутае абвінавачваньне ва ўдзеле ў масавых быспадарках. Утрымліваецца ў ізалятары на вуліцы Валадарскага.
XS
SM
MD
LG