Сёньня судзьдзя Савецкага раёну Гомелю Віктар Купрацэвіч аштрафаваў прыхільніка руху “За свабоду” Пятра Філона “за спробу арганізаваць несанкцыянаванае масавае мерапрыемства” на 3 базавыя велічыні. Гэта адпавядае 105 тысячам беларускіх рублёў.
Як паведаміў Пётар Філон, пратакол супраць яго склалі ў Савецкім райаддзеле міліцыі:
“У мяне сёньня першы дзень адпачынку. Блізу поўдня я быў дома. Прыйшоў участковы нібыта разьбірацца са скаргаю на гучную музыку, і я апынуўся ў райаддзеле. Там у дачыненьні мяне й склалі пратакол на васьмі старонках”.
Пётар Філон у сваім акаўнце “Вконтакте” разьмясьціў зварот, адрасаваны супрацоўнікам КДБ: “Таварышы афіцэры КДБ, я ўсё роўна звальняюся. Таму прашу не псаваць жыцьця мне і блізкім людзям”. Пасьля гэтага была невялічкая абвестка для сяброў і знаёмых: Філон запрасіў іх сустрэцца сёньня а 19-й гадзіне ля помніку воінам-аўганцам. Гэтая абвестка й была расцэненая як спроба арганізаваць несанкцыянаванае масавае мерапрыемства.
Да нядаўняга часу Пётар Філон працаваў выкладчыкам у Беларускім унівэрсытэце транспарту, але летась з ініцыятывы рэктарату быў пераведзены ў інжынэры катэдры. На мінулых выбарах у мясцовыя саветы Філон як незалежны кандыдат балятаваўся ў Гомельскі гарсавет. Ён адзін з актыўных карыстальнікаў сацыяльных сетак, браў удзел у “маўклівых акцыях”.
Рэгіянальны кіраўнік руху “За свабоду” Пётар Кузьняцоў лічыць, што, хутчэй за ўсё, спадара Філона пакаралі за тое, што ён адкрыта зьвярнуўся да “таварышаў афіцэраў КДБ”.