Лінкі ўнівэрсальнага доступу

"Камітэт абароны журналістаў" патрабуе спыніць судовы перасьлед Андрэя Пачобута


Праваабарончая арганізацыя "Камітэт абароны журналістаў" (ЗША) патрабуе спыніць судовы перасьлед гарадзенскага карэспандэнта польскай "Газэты Выбарчай" Андрэя Пачобута. Як адзначаецца ў заяве арганізацыі, КАЖ таксама патрабуе ад беларускіх улад неадкладна вызваліць Пачобута.

"Гэта абуральна, што журналіста ў Эўропе ў 21-м стагодзьдзі судзяць пры зачыненых дзьвярах толькі за тое, што ён пісаў крытычныя артыкулы пра абранага лідэра. З Андрэя Пачобута павінны зьняць усе гэтыя палітызаваныя абвінавачаньні і вызваліць", — сказаў намесьнік дырэктара КАЖ Робэрт Махоні.

14 чэрвеня ў судзе Ленінскага раёну Горадні пачаўся закрыты працэс у справе журналіста Андрэя Пачобута. Ён абвінавачваецца на падставе двух артыкулаў Крымінальнага кодэксу Беларусі: паводле часткі 1 артыкула 368 (абраза прэзыдэнта РБ) і паводле часткі 1 артыкула 367 КК (паклёп у дачыненьні да прэзыдэнта). Максымальнае пакараньне паводле першага артыкула — чатыры гады пазбаўленьня волі, паводле другога — два гады.

Крымінальная справа ў дачыненьні да Пачобута была распачатая 28 сакавіка. У пастанове пракуратуры сказана: "Пачобут А.С. у пэрыяд 2010—2011 гг. разьмяшчаў у глябальнай кампутарнай сетцы інтэрнэт на сайтах http://www.wyborcza.pl, belaruspartisan.org і poczobut.livejournal.com створаныя ім тэкставыя публікацыі пад загалоўкамі "Час закручваць гайкі", "Лукашэнка знайшоў чарговую мэту", "У Беларусі выбары бяз выбару", "Кажыце мне бацька", "Так кіруе Лукашэнка", "Лукашэнка: Так, я сфальсыфікаваў выбары", "Воля па-беларуску. Павініўся дык выйшаў?", "Перадвыбарны папулізм па-беларуску", "Так палохае беларускі КДБ" і адзін тэкст без загалоўка, які пачынаецца словамі "Дзякуй усім..." і які заканчваецца словамі "...можаце выкарыстоўваць", у якіх ёсьць прыкметы публічнай абразы прэзыдэнта Рэспублікі Беларусь".

Андрэй Пачобут, у сваю чаргу, сьцьвярджае, што не дапускаў абразы Аляксандра Лукашэнкі. "Так, у гэтых публікацыях ёсьць крытыка Лукашэнкі. Але мае публікацыі абразы не зьмяшчаюць — выключна крытыка. Можа быць, крытыка жорсткая, але абразы я не дапускаў", — заявіў тады журналіст, камэнтуючы БелаПАН прэтэнзіі пракуратуры.

Пачобут быў затрыманы 6 красавіка за парушэньне падпіскі аб нявыезьдзе: ён зьбіраўся выехаць з Горадні ў Менск для ўдзелу ў відэаканфэрэнцыі з дэпутатамі Эўрапарлямэнту. Спачатку яго затрымалі на трое сутак, затым меру стрыманьня зьмянілі з падпіскі аб нявыезьдзе на ўтрыманьне пад вартай.

Вызваленьня Пачобута запатрабавалі ад уладаў РБ кіраўніцтва ЭЗ і афіцыйная Варшава. Лёс гарадзенскага журналіста таксама абмяркоўваўся на перамовах польскіх уладаў з прэзыдэнтам ЗША падчас нядаўняга візыту Барака Абамы ў Варшаву.

Ваша меркаваньне

Паказаць камэнтары

XS
SM
MD
LG