Лінкі ўнівэрсальнага доступу

Эканамісты: абараняць унутраны рынак не патрэбна


Забарону на вываз некаторых беларускіх тавараў за межы Мытнага саюзу, якая пачала дзейнічаць ад учорашняга дня, многія экспэрты ацэньваюць як антырынкавую. На іх думку, такія адміністратыўныя захады перадусім зьменшаць і без таго невялікі ў параўнаньні зь імпартам беларускі экспарт. А гэта прывядзе да яшчэ большага дэфіцыту плацёжнага балянсу і недахопу валюты.

У пералік тавараў, якія часова забараняецца вывозіць зь Беларусі, трапілі лядоўні і маразільнікі "Атлант", берасьцейскія газавыя пліты, сынтэтычныя мыйныя сродкі, крупы, макароны. На шэраг харчоў уводзіцца абмежаваньне колькасьці, якую дазваляецца вывозіць.

Адметна, што танныя беларускія тавары вывозяць найперш расейцы – праз празрыстую мяжу, якая не кантралюецца. Аднак урадавая пастанова якраз расейцам і не перашкаджае, бо Расея разам з Казахстанам і Беларусьсю ўваходзяць у мытную "тройку". Дык дзе ж тады лёгіка? — спрабую высьветліць у эканамістаў-экспэртаў.

Міхал Залескі
"А яе і сапраўды няма", — лічыць эканаміст Міхась Залескі:

"Гэта — чыста піяр-акцыя. Як той певень казаў: пракукарэкаў, а там няхай хоць і не расьсьвітае. Сказалі і сказалі — для бабулек, якія глядзяць тэлевізар. Ім і пакажуць: глядзіце, як мы клапоцімся пра ўнутраны рынак.

Паглядзіце на нашых суседзяў — тых жа літоўцаў. Там бяры што хочаш, хоць ты задушыся. Табе яшчэ і дысконтную картку дадуць, абы толькі вёз болей з гэтай Літвы. І тут пытаньне галоўнае — нам экспарт патрэбны ці не?".

Упершыню падобныя абмежаваньні ў Беларусі паспрабавалі ўвесьці яшчэ ў 1991 годзе, згадвае кіраўнік аналітычнага цэнтру "Стратэгія" Леанід Заіка. Тады і ўзьнікла фармулёўка пра абарону ўнутранага рынку, якой карыстаюцца і дагэтуль:

Леанід Заіка
"Абараняць унутраны рынак не патрэбна. Чаму? Таму што чым больш вывозяць зь Беларусі тавараў і паслуг, тым большы наш экспарт і тым больш мы зарабляем валюты.

Але Лукашэнка і ўрад падыходзяць да гэта па-сацыялістычнаму. Яны думаюць, што вывезуць усё зь Беларусі і паліцы крамаў стануць пустымі. А насельніцтва павінна адчуваць, што ўлады пра яго клапоцяцца. І таму паліцы павінны быць поўныя. Гэта спрацоўвае такая сялянская лёгіка "сельпо" — калі зь "сельпо" вывозяць тавары ў горад, дык гэта дрэнна".
Шчыра кажучы, я расчараваны ў Мясьніковічу.

Новыя забароны не паўплываюць і на магчымасьць вывозіць беларускія харчы ў краіны Эўразьвязу, кажа Міхась Залескі:

"Іх жа туды нельга ўвозіць. Вы не спрабавалі ўвозіць, напрыклад, беларускае сала ў Літву ці Польшчу? Вам гэтага не дадуць мясцовыя мытнікі. Сала, гуркі, іншыя харчы. Ніхто вам ня дасьць везьці ежу туды".

Ну, а крыніцай эканамічных праблемаў, якія нельга спыніць адміністратыўнымі захадамі, Леанід Заіка называе адсутнасьць выразнага курсу беларускага рубля:

"Рубель у нас ня мае, так бы мовіць, меры вартасьці. Рубель "прасеў". З-за гэтага і пайшлі ўсе беды. Шчыра кажучы, я расчараваны ў Мясьніковічу. Ён і усе астатнія ва ўрадзе павінны былі гэта прадбачыць".

Ваша меркаваньне

Паказаць камэнтары

XS
SM
MD
LG