Грэцыя адпрэчвае намер адмовіцца ад эўра

Улады Грэцыі назвалі "безадказнымі" публікацыі ў СМІ аб тым, што Афіны, нібыта, пагражаюць выйсьці з зоны эўра, каб дамагчыся больш спрыяльных умоваў атрыманьня фінансавай дапамогі ад Эўразьвязу ды МВФ.

Гаворка ідзе аб публікацыі ў нямецкім выданьні "Шпігель", якая спрычыніла падзеньне курсу эўрапейскай валюты ў дачыненьні да даляра.

У пятніцу ўвечары міністар фінансаў Грэцыі Георгіюс Папаканстанціну ўзяў удзел у экстранным паседжаньні Эўрагрупы. Па выніках нарады фінансавае ведамства Грэцыі абнародавала заяву, у якой заявіла аб гатовасьці працягнуць эканамічную праграму на аснове пагадненьняў з ЭЗ, Эўрапейскім цэнтрабанкам і МВФ.

Названыя дамовы прадугледжваюць захады жорсткай бюджэтнай эканоміі, што правакуе рэгулярныя масавыя акцыі пратэсту грэцкіх прафсаюзаў.