ЗША высьвятляюць, ці дапамагалі пакістанскія ўлады хавацца бін Лядэну

ЗША паабяцалі высьветліць, ці дапамагалі пакістанскія ўлады Ўсаму бін Лядэну хавацца цягам доўгага часу. Пра гэта заявіў дарадца прэзыдэнта ЗША ў контратэрарызьме Джон Брэнан. Раней прэзыдэнт Пакістану Асіф Алі Зардары паведаміў, што Ісламабад не даваў прытулку лідэру «Аль-Кайды».

Прадстаўнік Белага дому Джэй Карней заявіў, што бін Лядэн ня быў узброены ў часе штурму ягонага дома амэрыканскім спэцназам, але спрабаваў супраціўляцца.

Паведамляецца таксама, што ў адміністрацыі прэзыдэнта ЗША ідуць дэбаты з нагоды публікацыі фотаздымка забітага бін Лядэна. Кіраўнік ЦРУ Леан Панета ў інтэрвію тэлеканалу NBC паведаміў, што здымак будзе апублікаваны. Аднак ёсьць боязь, што гэта можа прывесьці да росту антыамэрыканскіх настрояў.

Усама бін Лядэн быў забіты ў Пакістане 1 траўня ў часе апэрацыі амэрыканскіх спэцслужбаў.