Саюз беларускіх пісьменьнікаў заявіў, што распачынае акцыю па стварэньні фонду беларускай мовы і культуры ў першым замежным музэі народнага пісьменьніка Васіля Быкава.
Музэй месьціцца ў сярэдняй школе мястэчка Вялікая Севярынка Кіраваградзкай вобласьці Ўкраіны. У гэтай мясцовасьці Быкаў некалі ваяваў і ледзь не загінуў. Падзеі таго часу леглі ў аснову рамана "Мёртвым не баліць".
"Пішыце нам, расказвайце нам больш пра Васіля Быкава. Яшчэ мы марым стварыць у нашым музэі куток беларускай культуры. Калі можна, прышліце нам сьцяг, герб і гімн Беларусі… А яшчэ мы хочам вывучыць беларускую мову. Калі можна, дашліце нам беларуска-расейскі слоўнік. Тады мы зможам чытаць творы беларускіх пісьменьнікаў на іх роднай мове. Дзякуй вам за лісты, за фотаздымкі, за падтрымку", — пішуць школьнікі і настаўнікі зь Вялікай Севярынкі.
Саюз беларускіх пісьменьнікаў заклікае адгукнуцца на гэтую просьбу і сабраць вартую бібліятэку кніг па беларускай мове, літаратуры і гісторыі.
Вітаюцца як беларусазнаўчыя мастацкія і гістарычныя выданьні, так і кнігі мовазнаўчага характару: слоўнікі, навучальныя дапаможнікі і іншыя.
Збор кніжнага фонду для школы ў Вялікай Севярынцы будзе праходзіць з 1 па 31 сакавіка.