24 лютага Сьветлагорскі раённы суд можа вынесьці прысуд прадпрымальніцы Лілі Лагуцінай. Лагуціну, якой супрацоўнікі МУС зламалі руку, вінавацяць у супраціве міліцыянтам і гвалце над імі. Пацярпелымі праходзяць чацьвёра міліцыянтаў.
Справу супраць прадпрымальніцы Лілі Лагуцінай завялі пасьля таго, як яна паскардзілася ў пракуратуру, што міліцыянты пакалечылі ёй руку і ня выклікалі “хуткую дапамогу”, а павезьлі ў міліцыю.
Лагуціна: “Яны судзяць мяне за супраціў і гвалт над супрацоўнікамі міліцыі, хаця самі мне зламалі руку. Такі цяжкі пералом быў са зрушэньнем, што прыйшлося рабіць складаную апэрацыю. Цяпер замялі ўсю гэтую справу – быццам бы й не ламалі, і на мяне перакінулі віну. Цяпер мяне хочуць засудзіць за супраціў”.
Гэта ўжо другі судовы працэс над Ліляй Лагуцінай. Раней Сьветлагорскі суд пакараў прадпрымальніцу адным годам абмежаваньня волі. Але пракуратура падала пратэст, і абласны суд адмяніў вырак, накіраваў справу на новы разгляд.
Гэтым разам прадстаўнік Сьветлагоскай раённай пракуратуры Аляксей Скачынскі папрасіў пакараць Лілю Лагуціну трыма гадамі абмежаваньня волі без накіраваньня ў калёнію. Максымальны тэрмін пакараньня паводле артыкулаў – 6 гадоў пазбаўленьня волі.
Канфлікт у Лагуцінай зь міліцыянтамі адбыўся амаль паўтара гады таму. Яна заступілася за мужа, якога спрабавалі затрымаць міліцыянты. Кажа, што махнула сумкай, каб адчапіліся.
Адзін з пацярпелых, цяпер ужо былы афіцэр Дэпартамэнту аховы МУС, Яўген Мельнікаў, які затрымліваў жанчыну, лічыць, што Лагуціну трэба пакараць надзвычай строга:
“Жанчына проста ня бачыць, што зь ёй размаўляе міліцыя. Яна ня цяміла, што рабіла – нанесла ўдар сумачкай. Выскачыў сіняк на твары. Так зь міліцыяй нельга паступаць. Я лічу, што такіх людзей наагул трэба саджаць у турму. Яна перашкаджала затрымліваць мужа, хапала за міліцэйскую вопратку. Яе вялі да машыны, яна выкручвалася, вырывалася. Дзесьці крутнулася – і ў выніку сама сабе нанесла калецтва”.
Адвакат прадпрымальніцы спадар Каралёў не пагаджаецца з высновамі абвінавачваньня:
“З нашага пункту гледжаньня ў яе дзеяньнях адсутнічае склад злачынства, Паколькі супрацоўнікі міліцыі парушылі палажэньні закону пра органы унутраных спраў. Ёй не патлумачылі яе правы, не патлумачылі, куды яе і навошта зьбіраюцца дастаўляць”.
