Лінкі ўнівэрсальнага доступу

Сьвятлана Алексіевіч: У Беларусі ёсьць дзьве праўды


Сьвятлана Алексіевіч
Беларуская апазыцыя наіўная і аддаленая ад народу – кажа беларуская пісьменьніца Сьвятлана Алексіевіч у інтэрвію ў сёньняшнім выданьні Neue Zuercher Zeitung. Прапануем вам пераклад фрагмэнтаў гэтага інтэрвію.

NZZ: Ці трэба было чакаць, што Лукашэнка будзе бараніць сваю ўладу ўсімі сродкамі?

Алексіевіч: Так. Але ніхто ня мог уявіць, што гэта адбудзецца так крывава. Лукашэнка вядома ж не чакаў, што столькі народу выйдзе на вуліцу. Але ён быў да гэтага падрыхтаваны. Я жыву ў цэнтры. Увесь дзень я назірала, як навакольныя двары запаўняліся войскам, міліцыяй і спэцтэхнікай. Лукашэнка прыняў меры засьцярогі. Апазыцыя была наіўнай.

NZZ: Якая праграма была ў апазыцыі?

Алексіевіч: Не было ніякай. Апазыцыя будавала сваю праграму на крытыцы Лукашэнкі. Праграма Лукашэнкі была лепшая. Яна была больш выразная, больш сьпелая. Дзеля гэтага ў яго былі і час, і людзі. У апазыцыі не было моцных асобаў. Уявіце сабе: раптам вы бачыце дзевяць прэтэндэнтаў на пост прэзыдэнта. І вы пра іх нічога ня ведаеце. Як асобы, яны не пакінулі пасьля сябе ніякага ўражаньня. І яны выступалі супроць такога моцнага і здаровага мужыка як Лукашэнка, які падабаецца жанчынам і намэнклятуры! У нас іншыя арыентыры. Што ў цывілізаванай грамадзкасьці бачылася б як катастрофа, у нас успрымаецца людзьмі як норма.

NZZ: Апазыцыя занадта аддаленая ад народу?

Алексіевіч: Вядома. Я была прысутнай на выбарчым выступленьні Андрэя Саньнікава ў горадзе з паўмільённым жыхарствам. На сустрэчу прыйшлі чалавек 200. Зразумела, што паўсюды можна знайсьці 200 інтэлігентных людзей. Але гэта не народ.

NZZ: Але апазыцыя лічыць, што гэта яна выйграла выбары і мае доказы гэтага.

Алексіевіч: Я ня ведаю, адкуль бярэцца гэтае перакананьне. Я шмат паезьдзіла перад выбарамі і зразумела, што Лукашэнка пераможа. Яго падтрымлівае большасьць насельніцтва, ня толькі на правінцыі, але і ў вялікіх гарадах. 80 адсоткаў галасоў ён не атрымаў, але 50-60 адсоткаў напэўна.

NZZ: У вачах Захаду Лукашэнка робіць уражаньне няўстойлівага.

Алексіевіч: Для мяне ён псыхапат, і ўсе ягоныя дзеяньні – паталягічныя. Але існуюць дзьве праўды. Праўда інтэлігенцыі – у нас ёсьць пэрспэктыўныя ідэі, і мы хочам незалежнай і цывілізаванай Беларусі. І ёсьць другая праўда, больш простая – праўда большасьці. Для людзей на вёсцы свабода азначае каўбасу. Лукашэнка іх разумее. Ён – палітычная жывёліна. Ён робіць тое, чаго яны хочуць.

NZZ: Ці маюць значэньне заходнія санкцыі ў выглядзе абмежаваньня паездак для намэнклятуры?

Алексіевіч: Вядома. Але Эўропа цынічная, у яе свае інтарэсы. Акрамя таго, я ня ведаю, як можна такім спосабам націснуць на Лукашэнку. Ён і так нікуды ня езьдзіць. Захад жа яго так баіцца. Эканамічныя санкцыі былі б лепшыя. Але калі Захад замарозіць крэдыты, перш за ўсё будуць пакутаваць простыя людзі. Найбольш разумна было б падтрымліваць грамадзянскую супольнасьць, якую Лукашэнка цяпер пазбавіў галоваў.

NZZ: Ці хтосьці наогул мае ўплыў на Лукашэнку?

Алексіевіч: Толькі Крэмль. Лукашэнка знаходзіцца ў эканамічнай залежнасьці ад Расеі. Гэта адзіная форма ціску, якая дае вынік.

Глядзець камэнтары (98)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG