Лінкі ўнівэрсальнага доступу

Мядзьведзеў у Варшаве: Мы пайшлі на шэраг беспрэцэдэнтных крокаў


Д.Мядзьведзеў і Б.Камароўскі
Д.Мядзьведзеў і Б.Камароўскі
Урачыстае вітаньне прэзыдэнта Расеі Дзьмітрыя Мядзьведзева сёньня перад прэзыдэнцкім палацам у Варшаве праходзіла пры пратэстах людзей, якія дамагаюцца высьвятленьня ўсіх акалічнасьцяў катастрофы польскага ўрадавага самалёта Ту-154 пад Смаленскам 10 красавіка сёлета, у якой загінуў прэзыдэнт Польшчы Лех Качынскі з жонкай і яшчэ каля 100 чалавек.

Пратэстоўцы ў Варшаве трымалі расьцяжкі з надпісамі "Смаленск: Мы хочам праўды", "Чаму расейцы не аддаюць чорных скрынак?", "Дзе параненыя з самалёта?". Падобныя дэманстрацыі мелі месца таксама ў Кракаве, Познані і Гданьску.

"Нядобрая засуха ў польска-расейскіх стасунках закончылася", – сказаў прэзыдэнт Польшчы Браніслаў Камароўскі на супольнай прэс-канфэрэнцыі зь Дзьмітрыем Мядзьведзевым пасьля двухбаковых перамоваў.

Мядзьведзеў сказаў журналістам, што Расея пайшла на шэраг беспрэцэдэнтных крокаў насустрач Польшчы ў высьвятленьні расстрэлу польскіх афіцэраў у Катыні органамі НКВД. Расейскі прэзыдэнт у гэтай сувязі нагадаў перадачу Варшаве матэрыялаў з расейскага расьсьледаваньня катынскай трагедыі і нядаўнюю рэзалюцыю Дзяржаўнай Думы Расеі, у якой расейскі парлямэнт прызнаў адказнасьць таталітарнага сталінскага рэжыму за гэтае злачынства.

Адначасова Мядзьведзеў нагадаў, што ў двухбаковых польска-расейскіх адносінах пакуль яшчэ ня высьветлена справа гібелі дзясяткаў тысяч чырвонаармейцаў у польскім палоне ў пачатку 1920-х гадоў.

Адказваючы на пытаньне журналіста пра сьледзтва ў справе катастрофы польскага ўрадавага самалёта пад Смаленскам у красавіку, Мядзьведзеў прызнаў, што сьледзтва пакуль яшчэ не завершанае.

Камароўскі і Мядзьведзеў паведамілі журналістам, што прынялі пастанову ўшанаваць ахвяры катастрофы абэліскам на месцы іх гібелі.

Па выніках сустрэчы бакі падпісалі некалькі дамоваў эканамічнага характару.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG