Лінкі ўнівэрсальнага доступу

Кандыдаты разважаюць, якой будзе Беларусь без Лукашэнкі


Сёньня перадапошні дзень збору подпісаў за кандыдатаў у прэзыдэнты. Ініцыятыўныя групы ўдзельнікаў выбарчай кампаніі актыўна здавалі падпісныя лісты ў выбаркамы. А самі патэнцыйныя кандыдаты на прэзыдэнта сустракаліся з палітыкамі і экспэртамі, гаварылі пра тое, якія рэформы яны зробяць у выпадку перамогі на выбарах і адыходу ад улады А.Лукашэнкі.

Лідэр кампаніі "Гавары праўду" Ўладзімер Някляеў сёньня сабраў журналістаў зь беларускіх і замежных СМІ на прэсавую канфэрэнцыю, на якой прадставіў сваю дактрыну зьнешняй палітыкі, названую ім "Адказнае суседзтва".

Мы не зьбіраемся ў выпадку прыходу да ўлады прадпрымаць нейкія рэзкія рухі, якія прывялі б да абвалу існуючых з Расеяй дамоўленасьцяў
Палітык заявіў, што ў выпадку перамогі на выбарах 19 сьнежня пакіне расейскі вэктар у якасьці прыярытэтнага для Беларусі, бо гэта "жыцьцёва важна" для краіны, — лічыць ён:

"Мы не зьбіраемся ў выпадку прыходу да ўлады прадпрымаць нейкія рэзкія рухі, якія прывялі б да абвалу існуючых з Расеяй дамоўленасьцяў. Гэта датычыць як эканамічнага, сацыяльнага, гуманітарнага, гэтак і вайсковага блёкаў".

Пры гэтым спадар Някляеў ня выключыў, што пасьля ягонага прыходу да ўлады адбудзецца рэвізія ўсіх дамоўленасьцяў з Расеяй. Аднак, да прыкладу, дамова аб арэндзе Расеяй у Беларусі двух вайсковых аб'ектаў датэрмінова ня будзе спыненая. Палітык таксама заклікаў не дэманізаваць расейскі капітал і ня выключыў ягонага ўдзелу ў прыватызацыі беларускіх трубаправодаў і НПЗ.

Гаворачы пра адносіны Беларусі з Эўразьвязам, спадар Някляеў зазначыў, што тут давядзецца пачынаць з нуля, бо дагэтуль няма нават дамовы аб партнэрстве і супрацоўніцтве паміж Менскам і Брусэлем, і Беларусь адзіная на кантынэнце не зьяўляецца сябрам Рады Эўропы.

Беларусь пры прэзыдэнце Някляеве будзе імкнуцца ва Ўсясьветную гандлёвую арганізацыю, застаючыся ў рамках Мытнага саюзу і Адзінай эканамічнай прасторы. З НАТО Беларусь будзе супрацоўнічаць у рамках праграмы "Партнэрства дзеля міру". Хутка ўступіць у Эўразьвяз для Беларусі нерэальна, мяркуе палітык: гэта будзе магчыма разам зь сяброўствам у гэтай арганізацыі Ўкраіны і Расеі.

Адказваючы на пытаньне, куды ў выпадку перамогі на выбарах У. Някляеў наладзіць свой першы візыт: у Маскву, Брусэль ці Вашынгтон, палітык зазначыў: "На ўсход, на ўсход".

Тым часам іншы апазыцыйны кандыдат на пасаду прэзыдэнта Андрэй Саньнікаў сёньня знаходзіўся на Захадзе. У Бэрліне ён сустракаўся зь нямецкімі палітыкамі, прадстаўнікамі дзяржаўных устаноў, журналістамі.

Спадар Саньнікаў заявіў, што Беларусь зараз мае шанец пазбавіцца ад дыктатуры, менавіта ў сувязі зь цяперашняй выбарчай кампаніяй.

Адразу ж трэба будзе заняцца эканомікай і фінансавай сыстэмай, таму што краіне будзе вельмі цяжка вяртаць тыя запазычанасьці, якія робіць Лукашэнка
На круглым стале з удзелам нямецкіх экспэртаў Андрэй Саньнікаў выказаў прагноз разьвіцьця Беларусі пасьля прэзыдэнцтва Аляксандра Лукашэнкі:

"Наконт гэтага было шмат пытаньняў: якія будуць крокі рабіцца пасьля адыходу Лукашэнкі ад улады? Я казаў, што трэба будзе адразу ж аднаўляць падзел уладаў. Для гэтага, магчыма, давядзецца зьбіраць Канстытуцыйны сход, каб правесьці нармальныя выбары ў парлямэнт, гарантаваць незалежнасьць судоў. Адразу ж трэба будзе заняцца эканомікай і фінансавай сыстэмай, таму што краіне будзе вельмі цяжка вяртаць тыя запазычанасьці, якія робіць Лукашэнка. А мы будзем вымушаныя адказваць за тыя дзеяньні, якія тут рабіліся пры дыктатуры".

Паводле спадара Саньнікава, падчас ягоных сустрэч у Бэрліне выявілася вялікая цікавасьць да падзеяў у нашай краіне:

"Ёсьць спадзяваньне, што пачне нешта рухацца ў Беларусі. Але ёсьць і засьцярогі наконт тых мэтадаў, якія можа ўжываць дыктатура".

Кандыдат ад АГП Яраслаў Раманчук таксама выступіў з палітычнымі заявамі.

На паседжаньні Лібэральнага клюбу ён заклікаў рэзка скараціць разьдзьмуты бюракратычны апарат, пакінуўшы ўсяго 8 міністэрстваў, рэфармаваць адміністрацыю прэзыдэнта да ўзроўню сакратарыяту і скасаваць кіраўніцтва спраў прэзыдэнта, а таксама шэраг міністэрстваў:

Трэба міністэрствы прамысловасьці, сельскай гаспадаркі, адукацыі перавесьці ў разрад агенцыяў
"Шмат каго: Міністэрствы гандлю, інфармацыі, прамысловасьці… Трэба міністэрствы прамысловасьці, сельскай гаспадаркі, адукацыі перавесьці ў разрад агенцыяў, якія рабілі б заканадаўства для разьвіцьця гэтых галін, а не былі б псэўдакамэрцыйнымі структурамі, якія проста перашкаджаюць інвэстарам і прыватнаму сэктару".

Цягам дня Яраслаў Раманчук працаваў на пікетах у райцэнтрах Менскай вобласьці.

Кандыдат ад БХД Віталь Рымашэўскі таксама сёньня ўдзельнічаў у зборы подпісаў. Апрача таго, ён выступіў з заявай у падтрымку сям'і пастара пяцідзясятніцкай царквы з Магілёва Віталя Радчанкі, у якога мясцовыя ўлады хочуць забраць зямлю ля дома і ўчора спрабавалі разбурыць бульдозэрамі агароджу:

"Гэта жахлівы факт, прыклад дзейнасьці стопрацэнтна карумпаванай улады і стопрацэнтнай пагарды да правоў чалавека ў Рэспубліцы Беларусь. Рэжым наш фактычна захоўвае савецкія мэтады кіраваньня, так што нам трэба рыхтавацца да сур'ёзнага змаганьня".
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG