Ужо сёньня, 20 кастрычніка

Бліц-агляд падзеяў і тэмаў у Беларусі, сьвеце, гісторыі.

ПАРАСОН...

• ...будзе дарэчы. Тэмпэратура: 2 – 5 С.

НЕ ПРАХОДЗЬЦЕ МІМА:

• Пасольства Швэцыі ў Менску разам з Цэнтрам швэдзкіх дасьледаваньняў праводзіць прэзэнтацыю беларускага перакладу рамана швэдзкага пісьменьніка Мікаэля Ніемі "Папулярная музыка з Вітулы" у актавай залі філялягічнага факультэту БДУ а 17.30.
• Прэзэнтацыя паэтычнага зборніка Максіма Шчура "Амальгама" ў кнігарні "ЛогвінаЎ" (Менск, пр. Незалежнасьці, 37а) а 19.00.

ТАМ, ДЗЕ НАС НЯМА:

• У Страсбуры паседжаньне Рады Эўропы, прысьвечанае сытуацыі цыганоў (ромаў).
• У мястэчку Партэніт ва Ўкраіне сустракаюцца міністры абароны краінаў СНД.
• Прэзыдэнт Эўразьвязу Герман ван Ромпэй на Балканах.

ТАКСАМА Ў ГЭТЫ ДЗЕНЬ:

• У 1655 была заключаная Кейданаўская унія паміж ВКЛ і Швэцыяй, інцыятарам якой была група паноў і шляхты з Жамойці і да якой далучыліся Януш і Багуслаў Радзівілы.
• У 1854 нарадзіўся францускі паэт Арцюр Рэмбо (пам. 1891).
• У 1946 нарадзілася аўстрыйская пісьменьніца Эльфрыда Елінэк, ляўрэатка Нобэлеўскай прэміі 2004.

ЁСЬЦЬ НАГОДА:

• Сусьветны дзень статыстыкі.
• Міжнародны дзень авіядыспэтчара.

МІНУС 365:

• Год таму на сайце Свабоды: "За чацьвертаваньне беларуса ў Празе – 13,5 гадоў турмы".

ЦЫТАТЫ НА ПАМЯЦЬ:

Крумкач, нібы султан, сядае на галовы.
Вісіць на барадзе шматок былой шчакі.
Здаецца, ваяром, расьцятым да паловы,
Кардоннага мяча ня выпусьціць з рукі.

Ад гойсаньня ўваччу хістаюцца нябёсы,
Лілёвыя лясы працяў ваўчыны сквіл,
Вісельня, як арган, скавыча шматгалоса
Й пякельнай чырваньню палае небасхіл.

А ну, хутчэй скакаць, здыхляціна старая,
Што лашчыць неўпрыкмет ружанец пазванкоў,
Нібыта пацеркі манах перабірае:
Тут вам не манастыр, а кодла мерцьвякоў!

Арцюр Рэмбо, фрагмэнт "Балю шыбенікаў" (пераклад Андрэя Хадановіча).