Лінкі ўнівэрсальнага доступу

Актывіст ТБМ прапанаваў дапамогу кіраўніку вобласьці


Міхась Булавацкі
Міхась Булавацкі
Настаўнік вышэйшай катэгорыі, былы выкладчык унівэрсытэту імя Куляшова Міхась Булавацкі зьвярнуўся да старшыні Магілёўскага аблвыканкаму Пятра Рудніка зь лістом, у якім заклікае яго не спыняць высілкаў па адраджэньні беларускай мовы ў рэгіёне.

Сябра Таварыства беларускай мовы засяроджвае ўвагу кіраўніка вобласьці на тым, што зь яго ініцыятывы 2010 год на Магілёўшчыне абвешчаны годам роднай мовы й варта не абмяжоўвацца толькі гэтым годам.

Гэтым лістом мне захацелася падтрымаць гэтага чалавека ...
“Гэтым лістом мне захацелася падтрымаць гэтага чалавека, бо такія ініцыятывы ў нас пакуль ня надта вітаюцца. Нашы людзі пакуль не прызвычаіліся ўспрымаць словы “нацыянальны” лагодна. Яно мае пакуль савецкую нэгатыўную афарбоўку. Руднік жа прыняў рашэньне ў нацыянальным кірунку. Я думаю, што за гэта ён атрымаў ладную порцыю крытыкі. Па-другое, год роднай мовы абвешчаны, а што рабіць чыноўнікам у гэтым кірунку? Я ня ўпэўнены, што яны дакладна ведаюць гэта. Грамадзтва магло б ім дапамагчы”, — тлумачыць падставы звароту Міхась Булавацкі.

Актывіст заклікае Пятра Рудніка пасадзейнічаць у адкрыцьці ў Магілёве беларускамоўнай навучальнай установы.

“Адкрыцьця беларускамоўнай клясы дамагаецца група бацькоў. Ім неабходная дапамога й падтрымка. У 1994 годзе 6 працэнтаў магілёўскіх школьнікаў вучыліся па беларуску. Пасьля рэфэрэндуму 1995 году й цягам наступных трох год гэтыя шэсьць працэнтаў зьніклі. Дзе ж роўнасьць моў, пра якую казалі напярэдадні рэфэрэндуму?” — пытаецца Міхась Булавацкі.

Актывіст заклікае Рудніка спрыяць вырашэньню пытаньня аб ўсталяваньні ў абласным цэнтры помнікаў вядомым дзеячам беларускай культуры.

“Акрамя таго, аблвыканкам мусіць адсочваць, як выконваецца праграма па папулярызацыі беларускай мовы. Нехта павінен за гэтым сачыць і адзначаць тых, хто сапраўды папулярызуе мову”, — кажа Рудніку Булавацкі.

Вядома, што Магілёўскі аблвыканкам зьвяртаўся да адміністрацыі прэзыдэнта, каб 2010 год у Беларусі зрабілі годам роднай мовы. Ініцыятыву магілёўскіх чыноўнікаў не падтрымалі, але дазволілі распрацаваць праграму па яе папулярызацыі ў рэгіёне.

Адмысловая камісія, створаная загадам Пятра Рудніка, распрацавала “Комплекс першачарговых мер аблвыканкаму па папулярызацыі беларускай мовы на 2010-12 гады”. 31 сьнежня 2009 году Руднік яе зацьвердзіў. Пра тое, як яна ажыцьцяўляецца, у афіцыйных крыніцах зьвестак вобмаль. Сам Руднік за час існаваньня праграмы публічна гаварыў па-беларуску толькі раз — на дзень Канстытуцыі, калі ўручаў пашпарты моладзі.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG