Сурыкаў пра газавую вайну: ніякіх наступстваў ня будзе

"Патрэбна дакладна выконваць падпісаныя дакумэнты, у тым ліку і кантракты. У кантракце ўсё прапісана да апошняй кропкі, уключаючы і кошты транзыту", — выказаўся дыплямат пра прычыны газавай вайны.

"У апошнія дні была праяўленая мужнасьць і зьнятыя ўсе пытаньні як па абмежаваньні паставак газу, так і па ягоным транзыце. Што будзе далей? Далей будзем працаваць у рамках падпісанага кантракту. Трэба, каб такія спрэчкі сканчаліся судовымі справамі. Бо калі ў ролі судзьдзяў выступаюць высокія афіцыйныя асобы, гэта не зусім прыемна для народу", — заявіў Аляксандар Сурыкаў.