Лінкі ўнівэрсальнага доступу

Ці паўплывае газавы канфлікт на прэзыдэнцкую кампанію ў Беларусі?


Паводле "Газпрому", доўг "Белтрансгазау" можа вырасьці да канца году да 500-600 мільёнаў даляраў з разьлікаў па цане, ніжэй за кантрактную. Сытуацыя пасьля 1 ліпеня стане яшчэ больш вострай, прадказваюць экспэрты. У выпадку эскаляцыі канфлікту дэ-факта спыніць працу Мытны саюз Беларусі і Расеі, і беларускія тавары будуць пастаўляцца ў Расею на тых жа ўмовах, што літоўскія ці амэрыканскія. Абвастрэньне сытуацыі супадзе з кампаніяй па выбарах прэзыдэнта Беларусі, якія павінны адбыцца да 7 лютага 2011 г.

Пра тое, ці паўплывае газавы канфлікт паміж Масквой і Менскам на прэзыдэнцкую кампанію ў Беларусі, расейскі журналіст Уладзімер Кара-Мурза гутарыць з загадчыцай аддзелу палітыкі блізкага замежжа "Незалежнай газэты" Сьвятланай Гамовой і лідэрам грамадзянскай кампаніі "Эўрапейская Беларусь" Андрэем Саньнікавым.

Уладзімер Кара-Мурза: Ці ўгледжваеце вы палітычны кантэкст у патрабаваньні Расеі да Менску ў пяцідзённы тэрмін вызначыцца па аплаце запазычанасьці за газ?

Святлана Гамава: Ёсьць такое. Я думаю, што ёсьць палітычны кантэкст. Хутчэй за ўсё, ёсьць да гэтага крыўда на Беларусь, якая ставіць Расею ў няёмкае становішча ў сувязі з тым, што з 1 ліпеня мог бы запусьціцца Мытны саюз, які мог бы стаць адзіным рэальна эфэктыўным праектам у СНД, што запусьціла Расея за апошнія 20 гадоў. Шмат што стваралася, нічога ня выйшла. І тут Беларусь выкарыстоўвае гэты момант, спрабуючы выгандляваць нешта сабе перад выбарамі і наогул. Я думаю, што так: гэта спроба Расеі націснуць на Беларусь перад 1 ліпеня.

Уладзімер Кара-Мурза: Ці нагадвае вам тое, што адбываецца, нейкі перадвыбарчы гандаль?

Андрэй Саньнікаў: Я ня ведаю, адносіць гэта да галіны палітыкі ці чалавечых адносін. Калі гэта палітыка, то гэта несур'ёзна. Таму што Лукашэнка даўно ўжо гуляе на полі Расеі і даўно ўжо падманвае Расею. Калі гэта чалавечы фактар, то так, напэўна, з пункту гледжаньня Расеі незразумелыя паводзіны Лукашэнкі. Таму я б сказаў так: Лукашэнка сёньня абсалютна не прадстаўляе Беларусь, Лукашэнка абсалютна не прадстаўляе беларускую дзяржаву і беларускі народ. І тое, што адбываецца сёньня, ні да якіх вынікаў не прывядзе. І Мытны саюз, які спрабуе сфарміраваць Расія, ня ўзьнікне і ня будзе запушчаны менавіта таму, што няма нейкіх раўназначных партнэраў. Калі людзі неяк дамаўляюцца, напэўна, яны павінны трымаць слова. Я не ацэньваю зараз Мытны саюз, таму што мне незразумела, як гэта суадносіцца з СГА, з заяўкай на ўступленьне ў СГА і гэтак далей. Але папросту, калі партнэры спрабуюць пад сталом вырашаць больш, чым за сталом, ні да чаго гэта не прыводзіць.

Цалкам гутарку можна прачытаць ТУТ.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG