Лінкі ўнівэрсальнага доступу

Прэмію імя Васіля Быкава ўручылі Адзе Райчонак


Ада Райчонак: “Прэмію я адна не зарабіла б, мне заўжды дапамагалі сябры”

Сёньня на радзіме Васіля Быкава на Віцебшчыне, у вёсцы Бычкі, адбылося ўручэньне прэміі “За свабоду думкі” імя Васіля Быкава. Гэта прэмія заснаваная Рухам “За Свабоду” пад кіраўніцтвам Аляксандра Мілінкевіча і традыцыйна ўручаецца на ўгодкі Васіля Быкава, якому сёньня споўнілася б 86 гадоў.

Прэмія “За свабоду думкі” была заснаваная тры гады таму на ўзор прэміі “За свабоду” імя Сахарава, якой у 2006 годзе быў уганараваны Аляксандар Мілінкевіч. Сёлета ён прыехаў у Бычкі, дзе прэмія ўручалася ўжо ў трэці раз.

“Я думаю, што кожны чалавек, які нарадзіўся, хоча жыць у свабодзе. І для мяне Васіль Быкаў - гэта чалавек, які паказваў, што трэба жыць у свабодзе, у годнасьці, у праўдзе. І таму гэтая прэмія тым, хто працягвае ягоную гэтую справу. Ён любіў свой народ, і хацеў, каб народ жыў лепш. Гэтага хочам і мы. І мы вырашылі штогод у дзень народзінаў Быкава ўручаць гэтую прэмію тым, хто працягвае ягоную справу - тым, хто робіць тое, што можа, што ўмее, і паказвае прыклад”, -- сказаў Аляксандар Мілінкевіч.
Сёлета ганаровы дыплём і сымбалічную статуэтку аўтарства Віктара Копача атрымала Ада Райчонак, актывістка з Шаркоўшчынскага раёну, арганізатарка шматлікіх мастацкіх пленэраў і заснавальніца Цэнтру імя Язэпа Драздовіча. Уручыў прэмію леташні ляўрэат Алесь Пушкін:

“Гэтая прэмія павінна несьці адбітак жыцьця Васіля Быкава - гэта справядлівасьць, гэта праўда. Каб гэтая прэмія несла годнасьць Васіля Быкава, каб яна была ўручана справядліва. І ў гэтым годзе прэмію атрымлівае чалавек, які жыве не ў вялікім горадзе, бо беларушчына робіцца на месцах, тымі людзямі, якія жывуць у самай гушчы свайго народу. І сёлета прэмія “За свабоду думкі” уручаецца Адзе Райчонак!”

Прэмія Адзе Райчонак уручалася ў прысутнасьці шматлікіх гасьцей - на ўгодкі Быкава ў Бычкі прыяжджаюць пісьменьнікі, дэмакратычныя актывісты і ўсе, хто шануе памяць пісьменьніка-земляка. Прыехалі ў Бычкі і прадстаўнікі Вушацкага райвыканкаму.
Каля мэмарыяльнага музэя ў Бычках прайшлі літаратурныя чытаньні. А потым усе ахвотныя мелі мажлівасьць напісаць агульнанацыянальную дыктоўку, тэкст якой зачытала Зінаіда Бандарэнка.

Госьцяй сьвяткаваньня была сястра Васіля Быкава, спадарыня Валянціна. На жаль, па стане здароўя ня змог прыехаць у Бычкі Рыгор Барадулін, блізкі сябар Васіля Быкава.

На малую радзіму знакамітага пісьменьніка сёлета зьехаліся людзі зь Менску, Гомеля, Баранавічаў і практычна з усёй Віцебскай вобласьці - больш за сотню чалавек. Так на ўгодкі Быкава бывае штогод - яго кнігі і ягоныя запаветы не забываюць. Арганізатарам мерапрыемства выступіла Віцебскае абласное адзьдзяленьне ТБМ.

Глядзець камэнтары (2)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG