Лінкі ўнівэрсальнага доступу

Пэрформанс супраць абмежаваньня інтэрнэту


Актывісты моладзі БНФ пратэставалі супраць прэзыдэнцкага ўказу № 60, накіраванага на абмежаваньне інтэрнэту ў Беларусі, які пачне дзейнічаць ад 1 ліпеня. Маладыя людзі правялі пэрформанс на плошчы каля Камароўскага рынку.

Удзельнікі акцыі паведамілі «Свабодзе», што, на іх думку, фармат пэрформансу найлепш адпавядае тэме акцыі.

Пэрформанс пачаўся ў падземным пераходзе каля Камароўскага рынку.

На адным зь пяці ўдзельнікаў была камізэлька з надпісам «КДБ», а на астатніх — майкі з трыма літарамі «WWW», што, як вядома, азначае інтэрнэт.

Маладыя людзі, да якіх былі прывязаныя ланцугі, поўзалі на карачках, нібы сабакі, а хлопец у камізэльцы не даваў ім разьбягацца і ўвесь час цягнуў за ланцужкі. Удзельнікі флэшмобу пад рогат мінакоў дайшлі такім чынам да ганку Камароўскага рынку, і на гэтым акцыя завяршылася.

Ахоўнікі, сярод якіх быў заўважаны колішні кіраўнік міліцыі Савецкага раёну Менску, кінуліся да фотакарэспандэнтаў і патрабавалі паказаць ім дазвол рабіць здымкі каля дзяржаўнага рынку.

Франак Вячорка: «Гэта быў пэрформанс моладзі БНФ, прысьвечаны закону, які Лукашэнка зьбіраецца прыняць дзеля кантролю над інтэрнэтам. Мы хацелі паказаць, якім чынам КДБ і спэцслужбы зьбіраюцца затыкаць рот незалежным інтэрнэт-рэсурсам, сродкам масавай інфармацыі і проста беларускай моладзі.



Чалавек у майцы „КДБ“ трымаў на ланцужку людзей, якія сымбалізавалі розныя інтэрнэт-сайты з заткнутымі ратамі. Вось мы супраць такога падыходу да інтэрнэту. Інтэрнэт — гэта свабодная прастора, якую нельга кантраляваць».

Андрусь Крэчка: «Мы абралі такі фармат, каб абысьціся без затрыманьняў. Гэтыя вулічныя акцыі, на якіх усіх зьбіваюць і затрымліваюць, ня маюць сэнсу.

Гэтыя тры літары WWW людзі ведаюць усе, а таксама КДБ. Думаю, што людзі ўсе добра зразумелі сэнс гэтай акцыі. Усё відавочна — КДБ цісьне на інтэрнэт, не дае чытаць свабодныя навіны і выказваць свае думкі».

Янка Навакунскі ўпершыню ўдзельнічаў у пэрформансе.

«Мне гэтая акцыя вельмі спадабалася, бо гэта было штосьці такое новае, такое крэатыўнае, якога народ яшчэ ня бачыў. Тупа стаяць на акцыях мне ўжо надакучыла, хочацца новага. І народу гэта таксама, мне падаецца, надакучыла. Таму што трэба праводзіць нешта новае, з гумарам».

Хлопцы паскардзіліся, што крыху сьцерлі калені. Франак Вячорка быў у вайсковых штанах, у якіх камісаваўся з войска.

«Я сёньня адмыслова надзеў вайсковыя штаны ад вайсковай службы. Мне не шкада іх псаваць. Гэта адзінае, што мне засталося ад войска, і дзякуй Богу».

Ахоўнікі не пасьпелі выклікаць міліцыю, бо ўдзельнікі пэрформансу хутка сышлі.






Глядзець камэнтары (7)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG