Беспарадкі пачаліся ўчора. Паводле некаторых сьведчаньняў, звычайная спрэчка перарасла ў бойку паміж кіргізамі і ўзбэкамі, у якой была ўжытая агнястрэльная зброя і мэталёвыя трубкі. У горадзе ўспыхнулі пажары.
Тымчасовы ўрад Кіргізстану увёў у Ошы і ў трох прылеглых раёнах надзвычайнае становішча. У Ош увайшло войска з БТР-амі, над горадам лётаюць верталёты.
Выступаючы ў тэлебачаньні, кіраўнік тымчасовага ўраду Кіргізстану Роза Атумбаева заклікала жыхароў гораду Ош захаваць спакой і абвінаваціла ў беспарадках "розныя сілы", якія хочуць дэстабілізаваць сытуацыю ў Кіргізстане.
Міжэтнічныя канфлікты ў паўднёвым Кіргізстане ўзьнікалі і раней, у найбольш крывавым зь іх, у 1990 годзе, загінула некалькі соцень чалавек.
Беспарадкі ў Ошы і іншых раёнах паўднёвага Кіргізстану ўспыхнулі нанава пасьля зьвяржэньня прэзыдэнта Курманбека Бакіева ў красавіку. Якраз на поўдні краіны скінуты Бакіеў мае найбольш прыхільнікаў.
