Як паведаміў БелаПАН начальнік службы пагранічнага кантролю Брэсцкай пагранічнай групы Аляксей Курганаў, абмежаваньне зьвязана з пачаткам рамонту аўтамабільнага моста цераз Заходні Буг, які спалучае пункты пропуску "Цярэспаль" і "Варшаўскі мост" на беларуска-польскім участку мяжы. Рамонт будзе рабіць польскі бок. Ён будзе доўжыцца прыблізна да 17 ліпеня.
"У гэты час для руху будзе адкрыта толькі адна паласа моста, транспарт будзе прапускацца ў рэверсіўным парадку, — сказаў Курганаў. — У сувязі з гэтым мы рэкамендуем грамадзянам, якія зьбіраюцца ў гэты прамежак часу ехаць на аўтамабільным транспарце ў Польшчу або цераз Польшчу, выбіраць іншыя пункты пропуску".
"Варшаўскі мост" зьяўляецца цэнтральным аўтадарожным пунктам пропуску на беларуска-польскім участку мяжы. У сярэднім церазь яго штодзённа перасякаюць мяжу ў абодва бакі да 4 тысяч транспартных сродкаў і да 7 тысяч пасажыраў.
