Лінкі ўнівэрсальнага доступу

Ісьляндзкі вулькан "вырас" на 16 кілямэтраў, а самалёты лётаюць удвая ніжэй


Вывяржэньне вулькана Эяф’ятлаёкудль у Ісьляндыі прывяло да транспартнага каляпсу ў Эўропе. У дзясятку краінаў Эўропы адмененыя рэйсы грамадзянскіх авіякампаній: у прыватнасьці, скасавалі палёты блізкія да вострава паўночныя краіны, а таксама Нямеччына, Аўстрыя, Бэльгія, Літва, Латвія, Польшча. Афіцыйная Варшава ў гэтым зьвязку нават заявіла, што ня выключаны перанос пахаваньня прэзыдэнта Леха Качыньскага. Адкарэктаваў свой графік і беларускі авіяперавозчык "Белавія".


На чыгуначных вакзалах Эўропы – вялізныя чэргі

Адмененыя рэйсы з Менску ў Рыгу, Лёндан, Бэрлін...

Болей падрабязнасьцяў у выпусках міжнародных навінаў

У сувязі з актыўнасьцю ісьляндзкага вулькана адменены шэраг авіярэйсаў у краіны Заходняй і Паўночна-Заходняй Эўропы, заплянаваных кампаніямі "Аэрафлот", "Трансаэра", "British Airways", "Air France". Пра зьмены ў графіку расказалі і ў офісе беларускага манапаліста на рынку аівяперавозак, кампаніі "Белавія":
пакуль што ў нас стаяць на забарону толькі Лёндан і Рыга ...

"Так, Лёндан зачынены, Рыгу раніцай зачынілі. Гавораць, што Варшава таксама будзе зачыненая. Ёсьць зьвесткі што Парыж, аэрапорт "Шарль дэ Голь", таксама будзе адмяняць пасадку самалётаў. Але пакуль што ў нас стаяць на забарону толькі Лёндан і Рыга. У сьпісе на дазвол — Тбілісі, Масква, Бэрлін, Прага, Санкт-Пецярбург, Вена, Кіеў".

Як удакладнілі ў кампаніі "Белавія", воблака вульканічнага пылу ўздымаецца на вышыню да 16 кілямэтраў, тым часам як самалёты лётаюць нашмат ніжэй — да 10 кілямэтраў. А надвор'е ў паветраным калідоры мае істотнае значэньне — і гэта лішні раз пацьвердзілі трагічныя падзеі з самалётам прэзыдэнта Польшчы.
Агулам у Эўропе адмененыя 6 тысяч з 20 тысяч авіярэйсаў ...

Сёньня рэйсы некаторых кампаній былі спыненыя наўпрост у паветры: у прыватнасьці, самалёты, якія вылецелі з Масквы ў Парыж, Лёндан, Капэнгаген і Стакгольм, былі пасаджаныя на лётнішчах Цэнтральнай Эўропы — у Празе і Рыме. Агулам у Эўропе адмененыя 6 тысяч з 20 тысяч авіярэйсаў. Экспэрты чакаюць, што праблемы з паветранымі падарожжамі могуць патрываць цягам бліжэйшых двух дзён.

У беларускіх гідрамэтэаралягічных ведамствах не пацьвярджаюць магчымасьць выпадзеньня вульканічнага попелу на тэрыторыі Беларусі. Тым ня меней прагноз распаўсюду небясьпечных для палёту зьяваў даводзіцца да ўсіх экіпажаў, якія ажыцьцяўляюць палёты ў зоне, прылеглай да Ісьляндыі.

Мэтэароляг Валянцін Яцухна кажа, што Беларусь уключаная ў агульную сыстэму папярэджаньня пра надзвычайныя здарэньні, таму мае магчымасьць загадзя "анансаваць" надзвычайныя сытуацыі:

"У канцы 2008 году прынятая кліматычная праграма Беларусі. Там узятыя напрамкі для кліматычных праблемаў і адаптацыі да гэтых нездавальняючых умоваў. Гэта перадусім тычыцца трансфармацыі структураў пасяўных плошчаў, раньняй дыягностыкі, калі магчыма зрабіць папярэднія захады, каб прадухіліць анамальныя зьявы. Напрыклад, з дапамогай эўрапейскіх калегаў абвяшчаецца верагоднасьць штармавога надвор'я, і гэта апошнім часам збываецца. А калі людзі ведаюць пра небясьпеку, то гэта вельмі дапамагае. Бо надзвычай важна інфармаваць насельніцтва ў час".

Вулькан Эяф’ятлаёкудль, вывяржэньне якога пачалося 14 красавіка, знаходзіцца за 200 кілямэтраў ад сталіцы Ісьляндыі Рэйк'явіку. У зьвязку з надзвычайным здарэньнем у атмасфэру трапіла вялізная колькасьць попелу, што прывяло да закрыцьця паветранай прасторы над значнай тэрыторыяй Паўночнай Эўропы. Як заяўляюць экспэрты, выкіды нясуць небясьпеку для турбінаў авіяцыйных рухавікоў, а таксама выклікаюць праблемы, асядаючы на крылах самалётаў. Цяпер воблака з Ісьляндыі рухаецца на паўднёвы ўсход Эўропы.

Сёньня вульканічны пыл дасягнуў Аўстрыі. Ёсьць падставы прагназаваць, што да выходных вульканічныя ападкі прызямляцца і ва ўсходнеэўрапейскіх краінах.

Між тым, у Рэспубліканскім авіямэтэрэалягічным цэнтры зьяўленьне попелу над тэрыторыяй Беларусі лічаць вялікай. Вульканічнае воблака ўжо накрыла дзьве траціны тэрыторыі Літвы, а таксама зьявілася на поўначы Расеі.

***



У апошні раз вулькан ў раёне перавал Фімвердюхаўлс, разьмешчаны за дзьвесьце кілямэтраў ад сталіцы Ісьляндыі Рэйк'явіка, вывяргаўся амаль 200 гадоў таму – у 1821 і 1823 гадах. Зноў сэйсьмічная актыўнасьць вулькану пачала праяўляцца пасьля Калядаў – і да сакавіка адбылося каля тысячы падземных штуршкоў сілай у 1-2 балы на глыбіні 7-10 кілямэтраў пад вульканам.

25 сакавіка адбыўся выбух пары ў кратэры вулькану, куды патрапіла вада расталага ледніка, пасьля чаго вывяржэньне перайшло ў больш стабільную фазу. 14 красавіка, пасьля паўторнага вывяржэньня вулькану, улады Ісьляндыі абвясьцілі надзвычайнае становішча, прыняўшы рашэньне аб эвакуацыі з зоны стыхійнага бедзтва больш як 800 мясцовых жыхароў.

Спачатку далёка ня ўсе пачулі засьцярогі ўладаў – ад моманту пачатку сэйсьмічнай актыўнасьці на ледніку турысты літаральна апанавалі яго навакольле, прабіраючыся да падножжа вулькану на верталётах, джыпах і нават на матацыклах. Аднак экскурсійную дзейнасьць прыйшлося неўзабаве згарнуць, паколькі распаленыя вульканічныя выкіды растапілі прыкладна траціну ледніка, які пакрывае кратэр, што прывяло да стварэньня магутных водных патокаў і паводак.

Пры вывяржэньні вулькану была выкінутая вялікая хмара попелу, якая пачала рухацца ў бок кантынэнтальнай Эўропы. Здароўю людзей часьцінкі вульканічнага пылу не пагражаюць, аднак выкіды попелу вельмі небясьпечныя для авіяляйнэраў – дробныя часьцінкі забіваюць турбіну рухавіка, што можа прывесьці да яго спыненьня. Праблемы можа выклікаць і асяданьне попелу на крылах самалётаў, а акрамя таго, вульканічныя хмары моцна ўскладняюць бачнасьць для пілётаў.

Праекцыя руху попелу ад вывяржэньня вулькану. Жоўтым пазначаныя: попел, што выпаў сам па сабе; чырвоным – попел, што выпаў у выніку ападкаў; чорны – дзе попел знаходзіцца зараз. Выява Нарвэскага мэтэаралягічнага інстытуту.


Анімацыя распаўзаньня попелу ад вывяржэньня паводле Эўрапейскага касьмічнага агенцтва.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG