Лінкі ўнівэрсальнага доступу

На Берасьцейшчыне шукаюць тэрарыстаў


Берасьцейскі праваабаронца Ўладзімер Вялічкін паведаміў Радыё Свабода пра некалькі фактаў ціску на грамадзкіх актывістаў рэгіёну.


“Мне затэлефанаваў каардынатар мясцовай суполкі Партыі БНФ Алесь Рамановіч зь Пінску і пасьпеў сказаць літаральна некалькі словаў: мяне забіраюць, ідзе ператрус у мяне дома і ў дэмакратычнага актывіста Ўладзімера Зянька. Чутна была нечыя прысутнасьць, і на гэтым сувязь перарвалася.

Пасьля гэтага мне паведамілі, што на офіс прафсаюзу РЭП у Берасьці накіроўваецца супрацоўнік КДБ і хоча на месцы нешта “паглядзець”.

Гэтаксама затэлефанаваў старшыня рэгіянальнай арганізацыі Партыі БНФ з Драгічына Ўладзімер Казека і паведаміў, што яго выклікаюць у абласное ўпраўленьне КДБ да сьледчага Шаўчука”.

Што адбылося далей – расказвае сам Уладзімер Казека:

“Я ня мог нават прадбачыць, што яны мне зьбіраюцца прад’явіць. Але аказалася, што была ананімка: нібыта я здольны ўчыніць тэрарыстычны акт, у прыватнасьці, узарваць нафта- ці газаправод. А таксама здольны да забойства чыноўнікаў раённай вэртыкалі і ўнутраных спраў – у знак помсты за ранейшыя затрыманьні, суды і г.д. Якраз у гэтым ракурсе гадзіны паўтары і вялася гутарка. Але я адразу папярэдзіў, што ніякіх папераў ня буду падпісваць, бо такія абвінавачаньні папросту абражаюць маю чалавечую годнасьць. Чым гэта скончыцца, пакуль ня ведаю. Але ў мясцовае аддзяленьне КДБ таксама выклікалі маіх знаёмых і наўпрост запытвалі, ці здольны Казека ўчыніць тэрарыстычныя акты на тэрыторыі краіны”.

Сваё бачаньне актывізацыі спэцслужбаў – у камэнтары Ўладзімера Вялічкіна:

“У выпадку з Казекам і Рамановічам – гэта спроба перашкодзіць людзям удзельнічаць у выбарчай кампаніі. Прыпалохаць людзей, каб яны ад сваёй мэты адмовіліся. А ў выпадку з прафсаюзам, дык учора ў Берасьці была сустрэча грамадзкасьці з Уладзімерам Някляевым. І неадкладная рэакцыя, мяркую, зьвязана менавіта з гэтым фактам”.

Глядзець камэнтары (2)

Гэтая дыскусія закрытая.
XS
SM
MD
LG