Лінкі ўнівэрсальнага доступу

Выбары: апошні шанец стаць кандыдатам


Сёньня апошні дзень, калі патэнцыйныя прэтэндэнты на мандаты дэпутатаў мясцовых саветаў могуць здаць дакумэнты на рэгістрацыю. Зь якім багажом падышлі да гэтага дня апазыцыйныя палітычныя партыі?


Мікола Статкевіч, старшыня афіцыйна не зарэгістраванай Беларускай сацыял-дэмакратычнай партыі (Народная грамада), кажа: зьбіралі подпісы для рэгістрацыі 82 кандыдаты, падаюць дакумэнты ў выбарчыя камісіі —79:

“Тры чалавекі адмовіліся ад удзелу з-за таго, што ідзе ціск, ёсьць звальненьні. Напрыклад, Мікалай Расюк — актывіст “Народнай грамады” з Магілёва ўжо страціў працу. Ёсьць і так званы “ціхі” ціск, калі кажуць: альбо выбары, альбо праца. Асабліва на тых, хто працуе ў дзяржаўных установах альбо мае свой бізнэс. Такім чынам, страты ёсьць, але можна казаць, што яны адносна невялікія”.

Спадар Статкевіч таксама кажа, што больш кандыдатаў вылучаецца ва ўсходніх рэгіёнах і менш — у заходніх. Лідэр партыі тлумачыць гэта так:

“Гэта вынік парлямэнцкай выбарчай кампаніі 2008 году, калі быў жудасны ціск на нашых кандыдатаў у дэпутаты Палаты прадстаўнікоў. Найбольш ціснулі ў заходніх рэгіёнах, бо мы мелі агульную плятформу з “Эўрапейскай інтэграцыяй”. Улады палічылі, што яна можа быць больш папулярнай у заходняй частцы Беларусі. Там і быў найбольшы ціск, амаль усіх кандыдатаў не зарэгістравалі. І цяпер, як рэха той кампаніі, мы атрымоўваем вось такое разьмеркаваньне ўдзелу партыйных арганізацыяў у мясцовай кампаніі”.

Каля 100 кандыдатаў у дэпутаты вылучае Партыя БНФ, кажа яе старшыня Аляксей Янукевіч. Прыкладна пятая частка зь іх прыпадае на Магілёўскую вобласьць. Найбольш вядомыя партыйцы хочуць паспрачацца за мандаты дэпутатаў у сталічным гарадзкім савеце, адзначае Аляксей Янукевіч:

“Тут я вылучаюся, Віктар Івашкевіч, Вінцук Вячорка. Ёсьць вядомыя людзі і ў рэгіёнах. Так, у Слоніме Іван Шэга — вельмі аўтарытэтны чалавек”.

Найбольш актыўна вылучае кандыдатаў у дэпутаты партыя левых “Справядлівы сьвет”. Сакратар ЦК гэтай партыі Валеры Ўхналёў адзначае:


“Паводле папярэдніх дадзеных, у нас будзе 150—160 партыйных вылучэнцаў. Мы ведаем дакладна, што ўжо больш за 140 чалавек здалі дакумэнты. Астатнія пад’яжджаюць. Мы пераважна выкарыстоўваем партыйнае вылучэньне. Але там, дзе ў нас няма зарэгістраваных структураў, мы карыстаемся і зборам подпісаў. Такіх людзей меней, параўнальна з партыйным вылучэньнем. Аднак такія таксама будуць”.

На самым пачатку выбарчай кампаніі апазыцыя мела намер вылучыць ня менш за 1500 кандыдатаў у дэпутаты саветаў розных роўняў. Празь дзень-два стане вядома, ці ўправілася яна з гэтым.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG