Лінкі ўнівэрсальнага доступу

Генэральны сакратар АБСЭ пахваліў Мытны зьвяз


"Паміж Беларусьсю і АБСЭ ўсталявалася вельмі пазытыўнае і дынамічнае супрацоўніцтва", — заявіў журналістам ў Менску генэральны сакратар АБСЭ Марк Перэн дэ Брышамбо.


Паводле яго, бакі плённа ўзаемадзейнічаюць у рэалізацыі чарнобыльскіх праектаў, пытаньнях удасканальваньня аховы межаў, супрацьдзеяньні незаконнай міграцыі, разьвіцьці нацыянальнага заканадаўства, паведамляе БелаПАН.

Адказваючы на пытаньні студэнтаў БДУ пасьля лекцыі на тэму "АБСЭ ў кантэксьце сучасных выклікаў рэгіянальнай бясьпекі", генэральны сакратар закрануў тэму Мытнага саюза Беларусі, Расеі і Казахстану. Ён адзначыў, што АБСЭ ў рашэньнях Стамбульскага саміту 1999 году павітала разьвіцьцё рэгіянальнага эканамічнага супрацоўніцтва. Генэральны сакратар выказаў надзею, што стварэньне Мытнага саюзу станоўча адаб'ецца на дабрабыце і стабільнасьці трох краінаў, "бо гэта частка глябалізацыі".

Марк Перэн дэ Брышамбо адзначыў неабходнасьць паляпшэньня каардынацыі і абмену інфармацыяй паміж краінамі па пытаньнях транспартнай бясьпекі і стандартаў.

"Наша ўвага прыцягнута да Мытнага саюза Беларусі, Расеі і Казахстану. Важна, што наша сустрэча праходзіць тут, у Беларусі, якая разьмешчана на перакрыжаваньні асноўных транзытных транспартных шляхоў з поўначы на поўдзень і з усходу на захад. Гэта важна для эўразійскага кантынэнту", -- сказаў Марк Перэн дэ Брышамбо.

Старшынёўства Казахстану ў АБСЭ ў 2010 годзе дае шанец для пераадоленьня застойных тэндэнцый у арганізацыі, якія часта крытыкуюцца з боку Расеі і іншых дзяржаваў СНД, сказаў ён.

Марк Перэн дэ Брышамбо нагадаў, што ў пачатку 1990-х гадоў з АБСЭ зьвязваліся вельмі амбіцыйныя надзеі ў пляне вырашэньня актуальных пытаньняў эўрапейскай бясьпекі. "У тыя часы Міхаіл Гарбачоў казаў:" Няхай Эўропа будзе нашым агульным домам ", аднак па гістарычных прычынах гэтыя задачы не ўдалося выканаць і АБСЭ фактычна стала разьвівацца не ў тым напрамку, якое чакалася", - сказаў генэральны сакратар.

Прычынамі такога крызісу ў АБСЭ (калі, па ацэнцы многіх аналітыкаў, у арганізацыі засталося толькі супрацоўніцтва і не засталося бясьпекі) сталі югаслаўскі крызіс і пашырэньне НАТА на Ўсход. "У такіх умовах Расея стала адчуваць сябе ашуканай: дыялёг у рамках АБСЭ не апраўдаў яе надзей, і эўрапейская бясьпека засталася разбалянсаванай", - адзначыў ён.

"У гэтай сувязі казахстанскае старшынёўства ў арганізацыі можа даць нам магчымасьць пераадолець гэты крызіс, - лічыць генэральны сакратар. -- Бо Казахстан, улічваючы яго геапалітычнае становішча, можа пастарацца, каб думкі ўсіх краін - удзельніц АБСЭ былі данесенымі адзін да аднаго і такім чынам быў сфарміраваны новы эфэктыўны кансэнсус ".

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG