Што для вас свабода?
Свабода — адзіны варты спосаб існаваньня, жыць несвабодна = жыць чужым жыцьцём = жыць не сваім жыцьцём = ня жыць. Адзіным абмежаваньнем свабоды ёсьць культура.
Што найбольш абмяжоўвае вашу свабоду?
Я сам.
Што для вас шчасьце?
Атрымліваць асалоду ад таго, што робіш, і ўсьведамляць, што гэта карысна іншым (прынамсі, аднадумцам).
Чаго вы найбольш баіцеся?
Сябе.
Які талент вы хацелі б мець?
Стараюся пра гэта ня думаць, а абыходзіцца тым, што ёсьць, бо калі чаго ня дадзена, дык марыць пра гэта марна. Хоць вельмі хацелася б лётаць па паветры і плаваць пад вадой.
Кім з сучасьнікаў вы захапляецеся?
Паважаю вельмі многіх, вартых захапленьня людзей. Дзякуй Богу, іх шмат. Канкрэтызаваць не хачу, бо ўсіх не пералічыш, а назваць аднаго-другога дзеля ўзору немагчыма, бо назавеш гэтага, потым будзеш шкадаваць, што не назваў таго...
Што вы найбольш любіце рабіць?
Уфффф! Ну, напрыклад, перакладаць, ясная рэч. А больш не скажу!
Калі б можна было пражыць жыцьцё яшчэ раз, што б вы зьмянілі?
Яго пражыць яшчэ раз немагчыма, таму пытаньне, так сказаць, неадэкватнае. Лепш тады ўжо спытаць: ці верыце вы ў перасяленьне душ? Ня веру. Бо з уласнага досьведу ніколі ня меў гэтаму ніякіх доказаў. Зрэшты, уласны досьвед — не апошняя праўда, і таму пярэчыць тым, хто верыць, не хачу і ня буду. Але нават калі душа і перасяляецца, дык цела — не, а я складаюся зь дзьвюх частак, таму «я» пражыць жыцьцё яшчэ раз не змагу. Даводзіцца пасьпяваць жыць тут і цяпер.
Якую найлепшую параду вы атрымалі?
Мне вельмі падабаецца француская прымаўка: «Fais ce que dois, advienne ce qui devra». Даслоўна яна перакладаецца так: «Рабі, што павінен, і хай адбудзецца, што павінна [адбыцца]». Яе сутнасьць для мяне заключаецца ў тым, што пакуль жывеш так, як лічыш патрэбным, адказваеш за свае ўчынкі (што натуральна і што ня можа быць крыўдным), а калі жывеш ня так, як лічыш патрэбным, адказваеш за тое, што цябе змушае рабіць нехта/нешта (што бессэнсоўна і вельмі крыўдна).
Які ваш улюбёны дэвіз?
Ня маю такога.
У якой палітычнай сыстэме вы хацелі б жыць?
Пры камунізьме. Памятаеце той савецкі жарт: «Я таксама хачу ў Савецкі Саюз!» Зрэшты, марамі не жыву. Хоць разам з мэдыкамі лічу, што сон — рэч неабходная.
У якой краіне вы хацелі б жыць?
Вы пра горад Сонца ці Ўтопію? Той краіны, у якой я хацеў бы жыць, няма.
У якую эпоху вы хацелі б жыць?
Тут і цяпер.
Калі б вы сталі кіраўніком Беларусі, што б зрабілі найперш?
Падаў бы ў адстаўку.
Якія адносіны Беларусь павінна мець з Эўразьвязам?
Цяпер ці ўвогуле? Зрэшты, бяз розьніцы: любыя ўзаемаадносіны — гэта адносіны, якія будуюцца з двух бакоў у адпаведнасьці з тым, наколькі адзін бок ёсьць каштоўным для другога і наколькі другі бок паважае каштоўнасьці першага. На маю думку, Эўразьвяз для Беларусі безумоўна каштоўны, бо Беларусь частка Эўропы і эўрапейскай цывілізацыі, а таму мае (павінна мець) аднолькавыя зь ім/ёй каштоўнасьці.
Якія адносіны Беларусь павінна мець з Расеяй?
Такія самыя, як з Эўразьвязам — з улікам адной спэцыфічнай уласьцівасьці Расеі, якая спалучае ў сабе ў дадатак да большасьці эўрапейскіх, яшчэ і азіяцкія каштоўнасьці. Для нармальных адносінаў іх таксама трэба ўлічваць.
Некаторыя думаюць так: «Хай дыктатура, абы свая». А Вы?
Не.
Калі і як у Беларусі зьменіцца ўлада?
Калі большасьць людзей усьвядоміць сябе беларусамі (актыўна, а не пасіўна). Хочацца, каб пры гэтым улада зьмянілася не гвалтоўна.
Калі беларусы загавораць па-беларуску?
Калі актыўна ўсьвядомяць сябе беларусамі і захочуць імі быць, а не называцца.
Што будзе, калі беларусы не загавораць па-беларуску?
Ня будзе беларусаў, будуць жыхары Беларусі.
