Лінкі ўнівэрсальнага доступу

Анкета Свабоды: Алена Макоўская


Алена Макоўская
Алена Макоўская

Алена Макоўская – кіраўнік Міжнароднага грамадзкага аб’яднаньня “Згуртаваньне беларусаў сьвету “Бацькаўшчына” (абраная на Пятым зьезьдзе беларусаў сьвету ў ліпені 2009 году). Перад гэтым адбыла два тэрміны на пасадзе старшыні рады згуртаваньня (2001–2009). У самой арганізацыі – з 1992 году.


Што для вас свабода?

Свабода – гэта тое, што немагчыма адабраць, бо яна заўжды з табой. Свабода – гэта быць сабой. Свабода – гэта адказнасьць.

Што найбольш абмяжоўвае вашу свабоду?


Я сама.

Што для вас шчасьце?


Стан гармоніі – гармоніі з сабой, з навакольлем, з тымі, хто побач. Шчасьце – гэта ўсьмешкі навакол, адчуваньне паўнаты жыцьця. Шчасьце – калі цябе разумеюць. Шчасьце – калі бачыш вынікі сваёй дзейнасьці, калі іх бачаць і ўхваляюць людзі. Шчасьце – быць карыснай і запатрабаванай. У шчасьця шмат вызначэньняў. Шчасьце – гэта непастаянны стан, яно сыходзіць, але, што добра, абавязкова вяртаецца.

Чаго вы найбольш баіцеся?

Хацелася б напісаць – нічога. У дзяцінстве баялася цемры, а цяпер... Хіба што – не апынуцца там, дзе найбольш патрэбна быць. Самае страшнае – гэта бясьсільле.

Які талент вы хацелі б мець?


Захоўваць аптымізм у самыя складаныя моманты, перадаваць яго іншым людзям.

Кім з сучасьнікаў вы захапляецеся?

Я захапляюся шмат кім са сваіх сучасьнікаў. Мне выпала шчасьце працаваць з самымі таленавітымі і актыўнымі, самымі лепшымі людзьмі нашага часу – у Беларусі і на эміграцыі. У Беларусі гэта – Радзім Гарэцкі, Генадзь Бураўкін, Анатоль Грыцкевіч, Уладзімер Арлоў, на эміграцыі – Ірэна Каляда, Івонка Сурвіла, Хведар Нюнька, а. Аляксандар Надсан, Лявон Юрэвіч, Алена Міхалюк, Яўген Вапа, Янка Запруднік, Вітаўт Кіпель.

Што вы найбольш любіце рабіць?

Адчуваць плён бягучага дня.

Калі б можна было пражыць жыцьцё яшчэ раз, што б вы зьмянілі?

Некаторыя рэчы я б усё ж памяняла. Папярэдзіла б некаторыя нэгатыўныя ці нават трагічныя падзеі ў жыцьці сваіх блізкіх.
Якую найлепшую параду вы атрымалі?

Жыць сёньня. Жыць цяпер.

Які ваш улюбёны дэвіз?

Не спыняцца.

У якой палітычнай сыстэме вы хацелі б жыць?

У канстытуцыйнай манархіі.

У якой краіне вы хацелі б жыць?

Я ўжо жыву там, дзе хачу.

У якую эпоху вы хацелі б жыць?

Мяне цалкам задавальняе мая эпоха. Але на пэўны час хацела б наведацца ў часы Хрыста, Эўфрасіньні Полацкай, Усяслава Чарадзея.

Калі б вы сталі кіраўніком Беларусі, што б зрабілі найперш?

Вярнула б нацыянальныя герб і сьцяг. Да інаўгурацыі.

Якія адносіны Беларусь павінна мець з Эўразьвязам?

Партнэрскія. Найперш, на маю думку, варта было б далучыцца да палітыкі дабрасуседзтва.

Якія адносіны Беларусь павінна мець з Расеяй?

Празрыстыя.

Некаторыя думаюць так: “Хай дыктатура, абы свая”. А вы?

Беларусы нарэшце сталі ўсьведамляць сябе жыхарамі незалежнай краіны. Але колькі актыўных людзей выехала за межы Беларусі! Колькі, ня маючы магчымасьці рэалізавацца, дэградуюць і сьпіваюцца! З-за адміністрацыйнай формы кіраваньня заводамі зьніклі прафэсіяналы-мэнэджары, ёсьць проста выканаўцы. За апошнія гады мы згубілі вельмі шмат са свайго эканамічнага патэнцыялу, з інтэлектуальных рэсурсаў. Мы змаргіналізавалі нашу культуру і мову, фактычна зьнішчылі ў нашага народу пачуцьцё адказнасьці за краіну, нібыта мы не перанялі яе ў нашых продкаў, каб годна перадаць нашым дзецям. А што мы можам перадаць сёньня – пазыкі за крэдыты, пачуцьцё віны перад беларускай мовай і культурай?!

Калі і як у Беларусі зьменіцца ўлада?

Нечакана.

Калі беларусы загавораць па-беларуску?

Калі гэта будзе зьвязана з пэрспэктывай.

Што будзе, калі беларусы не загавораць па-беларуску?

Загавораць.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG