Лінкі ўнівэрсальнага доступу

“Вугоршчына ня можа сабе дазволіць столькі лядовых палацаў”


Фэрэнц Контра
На думку Надзвычайнага і Паўнамоцнага Амбасадара Вугорскай Рэспублікі ў Беларусі Фэрэнца Контры, стасункам Беларусі і Эўразьвязу перашкаджае ровень недаверу.

Сёньня на прэс-канфэрэнцыі, прысьвечанай нацыянальнаму сьвяту Вугорскай Рэспублікі, амбасадар Фэрэнц Контра заявіў:

“На жаль, у нашых краінах пакуль ня склалася ўражаньня, каб словы і дзеяньні беларускага кіраўніцтва заўсёды супадалі. Я прывяду прыклад. На саміце ў Празе па “Ўсходнім партнэрстве” прадстаўнік Беларусі пагадзіўся з дэклярацыяй, дзе гаворыцца пра тое, што аснова супрацоўніцтва — гэта агульныя каштоўнасьці, дзе гаворыцца пра неабходнасьць падвышэньня ў краінах-партнэрах роўню дэмакратыі, свабоды слова, свабоды друку, свабоды палітычных партый. Але калі я бачу па тэлебачаньні, што на Кастрычніцкай плошчы даволі часта зьбіваюць маладых людзей, падкрэсьлю — мірных дэманстрантаў, то ўзьнікаюць пытаньні: што браць пад увагу — словы ці тое, што паказваюць тэлекамэры? Калі людзі ў цывільным закрываюць камэры — відаць, ім нязручна, каб гэтыя камэры там былі. Калі журналістам перашкаджаюць выконваць свае прафэсійныя абавязкі... Атрымліваецца, што гэтыя людзі не зацікаўленыя ў тым, каб паміж нашымі краінамі было добрае супрацоўніцтва. Вось што перашкаджае супрацы ў палітычным пляне”.

Амбасадар Вугоршчыны падкрэсьліў, што дыпляматычнае прадстаўніцтва яго краіны ў Беларусі адкрыта да кантактаў як з прадстаўнікамі беларускага кіраўніцтва, так і з прадстаўнікамі апазыцыі, грамадзкай супольнасьці. Але ўзаемнасьць адчуваецца не заўсёды:

“Некаторыя прадстаўнікі ўлады не заўсёды ідуць на кантакт. Я магу папрасіць аб сустрэчы некаторага міністра, але ён занадта заняты. Папрашу яшчэ раз — яшчэ раз заняты. Ну... Навязвацца ня буду. Я размаўляю з тымі людзьмі, якія з задавальненьнем ідуць на кантакт, зь якімі ёсьць агульная тэма для размовы”.

Пэрспэктывы эканамічнага супрацоўніцтва выглядаюць ня вельмі аптымістычна, зазначыў Фэрэнц Контра:

“У Вугоршчыне пакуль што мы не знайшлі інвэстараў, якія б былі гатовыя будаваць у Беларусі спартыўныя комплексы. Я зайздрошчу вам, што ў пэрыяд крызісу ў Беларусі будуецца столькі спартовых комплексаў. Вугоршчына ня можа сабе гэтага дазволіць”.

Ёсьць і выпадкі, якія нэгатыўна ўплываюць на імідж Беларусі ў вачох вугорскіх бізнэсоўцаў:

“Без канкрэтыкі я магу прывесьці прыклад: адна беларуская фірма вінная чвэрць мільёна даляраў вугорскай кампаніі, і чамусьці гэтыя грошы не ідуць пакуль. Гэта моцна падрывае аўтарытэт Беларусі, таму што без наступстваў, вядома, гэткія рэчы не застануцца”.


Ваша меркаваньне

Паказаць камэнтары

Яшчэ на гэтую тэму

XS
SM
MD
LG