Лінкі ўнівэрсальнага доступу

Партыя свабоды й прагрэсу будзе судзіцца зь Мінюстам


Аргкамітэт па стварэньні Партыі свабоды й прагрэсу абскардзіць у Вярхоўным судзе Беларусі пастанову Міністэрства юстыцыі аб адмове рэгістраваць партыю. Такое рашэньне прынятае ў нядзелю на пасяджэньні камітэту ў Магілёве.

Паводле яго старшыні Ўладзімера Навасяда, цягам бліжэйшага месяца будуць падрыхтаваныя неабходныя дакумэнты ў суд.

“На судзе мы будзем абскарджваць ня толькі пастанову Міністэрства юстыцыі, але й дамагацца, каб суд даў ацэнку дзеяньням супрацоўнікаў структураў, якія парушалі канстытуцыйнае права нашых актывістаў на ўдзел у стварэньні грамадзкіх і палітычных арганізацыяў. Прыкладна да траціны заснавальнікаў партыі наведваліся па месцы іх працы й вучобы супрацоўнікі сілавых структураў і высьвятлялі, чаму яны вырашылі стаць заснавальнікамі палітычнай арганізацыі.
Уладзімер Навасяд
Паўтысячы заснавальнікаў атрымалі па пошце анкеты зь Міністэрства юстыцыі і абласных управаў юстыцыі. У іх былі пазначаныя паўдзясяткі пытаньняў адносна ўдзелу актывіста ў стварэньні арганізацыі. На пытаньні трэба было адказаць, анкету падпісаць і адправіць назад у Міністэрства. Я дужа сумняваюся, што такія мэтады працы законныя. Гэтую законнасьць мы і будзем высьвятляць у судовым парадку”, – паведаміў “свабодзе” Ўладзімер Навасяд.

Па фактах сустрэчаў супрацоўнікаў сілавых структураў з заснавальнікамі партыі, яе кіраўніцтва накіравала скаргі ў Міністэрства юстыцыі і абласныя ўправы юстыцыі. Паводле Ўладзімера Навасяда, у адказах зь Мінюсту гаворыцца, што парушэньняў заканадаўства ня выяўлена.

Міністэрства юстыцыі не зарэгістравала партыю, бо нібыта выявіла несапраўдныя зьвесткі ў значнай колькасьці заснавальнікаў.

Партыя свабоды й прагрэсу рэгіструецца ад 2003 году. Апошні чацьвёрты ўстаноўчы сход адбыўся ў Магілёве 18 красавіка. 17 траўня ў Міністэрства юстыцыі Беларусі былі пададзеныя партыйныя рэгістрацыйныя дакумэнты. Заснавальнікамі партыі выступілі 1011 чалавек. Для рэгістрацыі партыі патрабуецца адна тысяча. Міністэрства юстыцыі сваё рашэньне аб адмове рэгістраваць партыі прыняло 15 чэрвеня.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG