На памежным пункце Заольша, што ў Лёзьненскім раёне Віцебскай вобласьці, узмоцненага мытнага кантролю пакуль няма. Паводле супрацоўніка Віцебскай мытні Сяргея Голікава, сёньня а 9-й раніцы мытнікі з абласной структуры разьехаліся па сямі пунктах памежнага кантролю, якія знаходзяцца на мяжы Віцебшчыны з Пскоўшчынай і Смаленшчынай.
Гатоўнасьць узнавіць мытны кантроль у аб’ёме, аналягічным таму, які ёсьць з расейскага боку мяжы, існуе. Але адпаведнай каманды пакуль не паступала. У тым выпадку, калі такое распараджэньне паступіць, мытнікі гатовыя даставіць на памежжа транспартныя модулі, кампутарнае абсталяваньне і распачаць кантроль на мытных пастах, якія былі скасаваныя на беларуска-расейскай мяжы ў 1995 годзе.
На беларуска-расейскай мяжы на пераходзе “Рэдзькі” на трасе Берасьце — Менск — Масква зьявіліся два мытныя фургончыкі.
Паблізу прыпаркаваўся мікрааўтобус з супрацоўнікамі мытні. Пра гэта паведамляе “Комсомольская правда в Белоруссии”.
Спачатку мытнікі пачалі ўсталёўваць беларускі сьцяг і плякат “Дорогие россияне, извините, но это не вина белорусов в том, что вы терпите неудобство на границе”. Аднак гэты плякат хутка згарнулі.
Ніводную машыну з расейскімі нумарамі мытнікі не спынілі. Адзін з мытнікаў патлумачыў, што яны ў рэжыме чаканьня.