У.Какашвілі: У Расеі няма такога попыту на “Беларусь TV”, як на расейскія каналы ў Беларусі

Перадусім спадар Какашвілі лічыць, што казаць пра самастойнае рашэньне апэратараў кабэльнага вяшчаньня, якія нібыта па ўласнай волі адмовіліся ад пяці расейскіх каналаў, не выпадае:

“Тое, што сьцьвярджаецца – маўляў, такое рашэньне прынялі кабэльныя апэратары на нейкім сваім паседжаньні – дык ведаеце, у выпадку з “унтэрафіцэрскай удавой” таксама сьцьвярджалася, што яна сама сябе высекла. Які кабэльны апэратар на такое пойдзе? Я займаюся распаўсюджваньнем каналаў больш за 10 гадоў. Няма такіх кабэльных апэратараў, якія самі адмовяцца ад распаўсюду таго, што абанэнты ўжо атрымліваюць і за што грошы плацяць. Ну гэта ж абсурд! І ня вельмі, як я разумею, замянілі штосьці ў Беларусі, суцэльныя дзіркі ў эфіры…”.

У сьпісе забракаваных беларускімі апэратарамі кабэльнага вяшчаньня “TВ-Центр” апынуўся першым. Уладзімер Какашвілі згадвае, што гэтаму папярэднічала:

“Вы апіраецеся на падзеі 1 красавіка, калі адключылі іншыя каналы, аднак мы “чашу” гэтую выпілі раней, проста нас да ўсіх “прышпілілі”. У нас свая гісторыя. Магу сказаць, што нам доўга выкручвалі рукі, каб мы аддалі праграму “Сталічнаму тэлебачаньню”, каб СТВ само яе фармавала на свой густ, укліньвала рэкляму, запускала ў эфір і аддавала ў кабэльныя сеткі. Пры гэтым нам далі дамову, па якой ад рэклямы там быў запісаны “нуль”. Гэта не фігуральна кажучы, а проста права ўрэзкі рэклямы мы прадстаўляем бясплатна”.

Карэспандэнт: “У “Сталічнага тэлебачаньня” ужо ёсьць Ren-TV…”

“Магчыма, падалося недастаткова. Але ж у іх ня толькі Ren-TV, апроч гэтага яны таксама “РТР-Беларусь” робяць”.

Чаму, адрозна ад НТВ, РТР ды Першага расейскага каналу, ТВЦ адмовіўся ад беларускай адаптацыі?

“Па-першае, у нас міжнародная вэрсія, адна ідэалёгія – адзіная вэрсія для ўсіх краінаў блізкага і далёкага замежжа. Міжнародны канал, якія нідзе не перарабляецца, тым больш, на мясцовы манэр. Па-другое, два месяцы вялі трансьляцыю без нашай згоды! Проста ўзялі і паставілі ў эфір. Дамову мы не падпісвалі, таму што ў нас эфірных правоў на праграму няма. Гэта канал, які распаўсюджваецца ў кабэльных сетках і на індывідуальныя талеркі. Але пры гэтым СТВ два месяцы нас вяшчала несанкцыянавана. Мы неаднаразова зьвярталіся да СТВ, у Мінінфарм з патрабаваньнем трансьляцыю ў эфіры на 29-й ТВК спыніць. І ўзгадніць усе дамовы (а было падпісана 60 пагадненьняў з кабэльнымі апэратарамі ў Беларусі). Аднак міністэрства выкручвала рукі, націснула на “Космос TV”, каб той нам не плаціў, хоць была падпісаная дамова. У “МТІС” аддалі праз СТВ, таму апэратар вяшчаў нас без дамовы. Пасьля таго, як да нас пачалі паступаць прэтэнзіі ад праваўладальнікаў, СТВ усё ж прыслухаўся да голасу розуму і эфір выключыў. А праз некалькі дзён нас выключылі ў кабэлі Менска, а 1 красавіка ўжо і па ўсёй Беларусі”.

Адной з прэтэнзій да расейскага боку – рэзкае падвышэньне кошту за трансьляцыю каналаў. Маўляў, новых тарыфаў беларускія апэратары папросту не адужалі. Камэнтуе Ўладзімер Какашвілі:

“Сьцьвярджаецца, што “ТВ-Центр” падвысіў плату за канал. На самой справе, абанэнцкая плата за TVCI ёсьць мінімальнай, яна не зьмянялася ад 2008 году і складае 5,5 цэнта за аднаго абанэнта, якія спаганяе наш прадстаўнік з кабэльнага апэратара. Таксама гаворыцца, што TVCI нібыта забірае рэклямныя прыбыткі ў мясцовых кампаній, якія разьмяшчаюць сваю рэкляму на TVCI, пакідаючы такім чынам мясцовыя каналы без гэтых паступленьняў. Гэта абсалютная няпраўда, паколькі на TVCI не было, няма і ў бліжэйшай будучыні рэклямы ня будзе. Гэта цудоўна ведалі гледачы, якія глядзелі канал і ня бачылі там ніводнага рэклямнага роліка”.

Пры канцы мінулага тыдня тэму адключэньня расейскіх каналаў закрануў Аляксандар Лукашэнка. Апроч асабістых крыўдаў, маўляў, расейцы выстаўляюць яго “ідыётам”, а ягоных дзяцей – “ненармальнымі і жулікамі” – ён акцэнтаваў увагу на поўнай адсутнасьці парытэту. Па словах Лукашэнкі, у той час як Беларусь ў мэдыйнай прасторы Расеі не прадстаўленая практычна ніяк, расейскіх каналаў у беларускім эфіры – дзясяткі. Пры гэтым рубам паставіў пытаньне спадарожнікавага каналу “Беларусь TV”, ад якога ўпарта адмаўляюцца расейскія апэратары кабэльнага вяшчаньня. Як лічыць дырэктар дырэкцыі замежнага вяшчаньня каналу “ТВ-Центр” Уладзімер Какашвілі, пра нейкі парытэт у дадзеным выпадку гаварыць не даводзіцца:

“У дадзеным выпадку ўсё вызначаецца чыстай камэрцыяй. Ня будзе знаходзіць попыту беларускі канал. Папросту ня будзе за яго глядач плаціць. Таму ў нейкіх сетках ён ідзе, але тое, што жадае Міністэрства інфармацыі – каб ён шоў у асноўных кабэльных сетках Масквы – то тут усё ўпіраецца ў ёмістасьці. Ёмістасьці абмежаваныя і за іх каналу трэба альбо плаціць, калі ў яго маецца пэўная мэта, што яго абавязкова трэба паказваць (рэкляму ставіць ці яшчэ нешта), альбо вы аддаяце кабэльнаму апэратару і ён прадае, зьбірае грошы. Частку пакідае сабе, частку аддае вам. Вось па такім прынцыпе мы распаўсюджваліся ў Беларусі. На нас ёсьць попыт, людзі гатовыя за нас плаціць. Роўна як і за іншыя расейскія каналы. Але гэта відавочна: пры ўсёй павазе да Беларусі (я тут баюся быць незразумелым), няма такога попыту на “Беларусь TV” у Расеі, як на расейскія каналы ў Беларусі. Таму тут патрабаваць нейкага парытэту немагчыма, гэта – чыстая камэрцыя. Я не хацеў гэта гаварыць, але, напэўна, расейскае тэлебачаньне мацнейшае, цікавейшае, людзі хочуць яго глядзець, таму гатовыя і грошы плаціць”.