Лінкі ўнівэрсальнага доступу

Літаратурную прэмію “Гліняны Вялес” за найлепшую кнігу мінулага году атрымаў пісьменьнік Барыс Пятровіч. Урачыстая цырымонія ганараваньня адбылася сёньня ў Полацку ў Музэі беларускага кнігадрукаваньня.


Сёньня, у Міжнародны дзень паэзіі, пісьменьнік Барыс Пятровіч атрымаў літаратурную прэмію за кнігу кароткіх празаічных мініятур і вершаў “Жыць ня страшна”. Цырымонія ўручэньня гэтай незалежнай прэміі, заснаванай у 1993 годзе Таварыствам вольных літаратараў, традыцыйна адбылася ў Полацку ў Музэі беларускага кнігадрукаваньня. Распавядае каардынатар ТВЛ Алесь Аркуш:

Алесь Аркуш
“Тут прыехалі госьці зь Менску і зь Віцебску, сабраліся прадстаўнікі інтэлігенцыі з Полаччыны. Традыцыйна ляўрэат атрымаў узнагароду – керамічнага “Глінянага Вялеса”. Пасьля гэтага яго павіншавалі ягоныя сябры вядомыя пісьменьнікі Ўладзімер Арлоў, Алесь Пашкевіч, Сяржук Сыс. А напрыканцы імпрэзы адбыўся паэтычны маратон, бо сёньня – Міжнародны дзень паэзіі, таму ўсе прысутныя на імпрэзе паэты чыталі свае вершы”.

Для Барыса Пятровіча “Гліняны Вялес” – гэта першая літаратурная ўзнагарода, хоць ягоная пасьпяховая творчасьць налічвае ўжо не адзін год. У сваёй ляўрэацкай прамове ён гаварыў пра сваё пакаленьне ў беларускай літаратуры, а гэта пакаленьне “Тутэйшых”, як пра замоўчанае. У інтэрвію нашаму радыё спадар Пятровіч патлумачыў:

“У майго пакаленьня лепшыя творчыя гады прыйшліся на гады смуты, калі і дзяржава практычна не дапамагала творцам, і не было мэцэнатаў, таму кніжкі выходзілі рэдка. Не было практычна доступу да тэлебачаньня, радыё і газэт і таму інфармацыі пра новыя кнігі і творчасьць пісьменьнікаў было вельмі мала. Многім маім аднагодкам, тым, каму ў дзевяностыя гады было 25-30 гадоў, сёньня 50. Час нібыта падводзіць нейкія вынікі, а мы практычна не гатовыя да гэтага”.

Нягледзячы на мінорны тон прамовы настрой у ляўрэата сьвяточны.

“Атмасфэра і само сьвята тут падпарадкавана нейкім традыцыям і гэта вельмі добра. Я хацеў бы, каб у нас у Беларусі як мага больш было цікавых і значных прэміяў і такіх сьвятаў, як сёньня”.

Нагадаем, што незалежны літаратурны часопіс “Дзеяслоў”, галоўным рэдактарам якога зьяўляецца Барыс Пятровіч, таксама мае сваю штогадовую прэмію “Залаты апостраф”.

Ваша меркаваньне

Паказаць камэнтары

XS
SM
MD
LG