Лінкі ўнівэрсальнага доступу

Крызіс: забудоўнікі ня здатныя выкупіць кватэры


У Бабруйску домабудаўнічы завод ня можа прадаць новых кватэр. У Баранавічах 22 сям’і пакінулі жыльлёва-будаўнічы каапэратыў. У Горадні ў крызіс трапіла прыватная будаўнічая фірма.


БАБРУЙСК

У Менску чыноўнікі заяўляюць, што эканамічны крызіс дапаможа зьменшыць кошты на жытло. У Бабруйску ж будаўнічыя арганізацыі прызнаюць, што на новае жытло попыт зьмяншаецца.

На Бабруйскім домабудаўнічым камбінаце кажуць пра наступныя праблемы сёньняшняга дня:

“Крызіс тычыцца неплацяжоў з боку прыватных інвэстараў, якія прыцягваюць замежныя сродкі на свае праекты. Звычайна гэтая праблема вылазіць на самым апошнім этапе — калі адбываецца здача дому. Частка жыльцоў уласныя сродкі ў час ня можа ўнесьці. Па дзьвесьце пяцьдзясят мільёнаў не аплачана на адным з дамоў”, — паведаміў прадстаўнік домабудаўнічага камбінату.


“У нас сем кватэраў засталося — і ня можам іх прадаць”

Тым часам у чарзе на атрыманьне жытла ў Бабруйску стаіць больш за трынаццаць тысяч чалавек. Высьветліць, наколькі зьменшыцца чарга, калі ўзьвядуць заплянаваныя сто сорак тысяч квадратных мэтраў, не ўдалося.

Ці дарагое новае жытло ў Бабруйску? На заводзе буйнапанэльнага домабудаваньня прызнаюць: дарагое. Адзін квадратны мэтар прадаецца больш як за адзін мільён дзевяцьсот тысяч:

цэны на жытло павінны зьменшыцца, бо ад сакавіка будаўнічыя матэрыялы стануць таньнейшымі ...
“У нас вось сем кватэраў засталося — і ня можам іх прадаць. Ужо, напэўна, паўгода. Людзі неахвотна хочуць браць іх за такія грошы”, — паведаміла супрацоўніца заводу.

У Магілёўскім аблвыканкаме абяцаюць, што сёлета цэны на жытло ў вобласьці павінны зьменшыцца, бо ад сакавіка будаўнічыя матэрыялы стануць таньнейшымі:

“Плянуецца зьмяншэньне коштаў на цэмэнт — пакуль на дзесяць працэнтаў. На шчэбень плянуецца пакуль зьмяншэньне. А таксама ў сярэднім жалезабэтону — на шэсьць працэнтаў”, — паведаміў супрацоўнік аблвыканкаму.

БАРАНАВІЧЫ


На сёньня ў Баранавічах ужо больш як 20 сям’яў маладых настаўнікаў і лекараў адмовіліся будаваць жыльлё праз ільготны каапэратыў. Яшчэ 80 сем’яў абвінавачваюць мясцовых чыноўнікаў у дыскрымінацыі грамадзянскіх правоў і наўмысным завышэньні каштарысу будаўніцтва.

Я прысутнічаў на апошнім сходзе баранавіцкіх забудоўшчыкаў. Амаль сто чалавек сабраліся ў фае Баранавіцкага райвыканкаму. Людзі мітынгавалі супраць будоўлі дома ва ўрочышчы “Балота”, што ў ваколіцах гораду. Я запісаў некаторыя скаргі.

Кватэры міліцыянтам будуюць у цэнтры, лекарам — на балоце

“Міліцыя будуе ў ваенным гарадку, а лекары — на балоце!” — заяўляе адна з удзельніц каапэратыву.

Яе падтрымлівае суседка:

“Мы праект ня бачылі. Нам не расказвалі, які гэта праект”.


Абранае для будоўлі месца небясьпечнае паводле экалёгіі — нагадвае старшыня каапэратыву Людміла Сідар:

“Там жудасныя ўмовы пакінулі яшчэ камуністы. Там поўнае сховішча мэталічнай стружкі з заводу. Калі ўлады плянавалі будаваць у гэтым месцы дом, то напачатку трэба было хаця б вывезьці стружку”.

Гэта толькі малая частка выказаных праблем і прэтэнзій. Аднак начальніка жыльлёвага аддзелу райвыканкаму Андрэя Сямашку скаргі не бянтэжылі:

“Калі быў сход, я сказаў, што арыенціровачна пад будаўніцтва вашага дома плянавалі іншае месца — на вуліцы Машэрава. Але чамусьці месца забудовы на Машэрава ва ўправу архітэктуры не дайшло. Далі іншае месца забудовы, і было прынята рашэньне менавіта там фармаваць ЖБК. Таму пытаньне не абмяркоўваецца. Месца забудовы зьменена ня будзе”.

Забудоўшчыкам цяпер даводзіцца вырашаць: або сысьці з каапэратыву, як зрабілі раней 22 сям’і, або далей змагацца за справядлівасьць.

Берасьцейскі праваабаронца Ўладзімер Вялічкін тлумачыць, чаму лекарам нельга атрымаць тое, што ўлада прапануе міліцыянтам:

“У дадзеным выпадку хто бароніць дзяржаву ад народу, той і карыстаецца ўсім лепшым. А таму ж народу застаецца менавіта балота. Такім чынам, справа глыбейшая і важнейшая: яны мусяць бараніць правы — свае і сваіх дзяцей”.

ГОРАДНЯ


У Горадні сярэднія і малыя прыватныя будаўнічыя фірмы таксама сутыкнуліся з праявамі эканамічнага крызісу.

У прыватнай гарадзенскай будаўнічай фірме “Будоўля” працуе каля 200 чалавек. Пераважна яны будуюць пад ключ сярэднія аб’екты, як для прыватных, так і дзяржаўных заказчыкаў.

Прыватным будаўнікам ужо цяжэй, чым дзяржаўным

Дырэктар фірмы Павал Бузук кажа, што з праявамі эканамічнага крызісу давялося сутыкнуцца адразу пасьля Новага году.

“Праблемы ў тым, што заказаў новых пакуль няма, а на старыя заказы нестае фінансаў, каб іх скончыць. Праўда, зімой заўсёды было няясна з гэтым, таму спадзяёмся, што, можа, нешта зрушыцца. Хаця моцна нам ніхто не абяцае, што мы будзем бурна працаваць”.

Дырэктар таксама дадае, што заробак будаўніка адчувальна зьнізіўся.
заробак зьменшыўся, і намнога... на 20—30%, а можа, нават і на ўсе 50%” ...

“Вядома, заробак зьменшыўся, і намнога. Крызіс у нас наступіў з новага году, і яшчэ не магу так дакладна прааналізаваць гэта. Але ўпэўнены, што будзе й на 20—30%, а можа, нават і на ўсе 50%”.

Кіраўнік невялікай будаўнічай фірмы “Кротбуд” Валеры Дваранчык таксама кажа, што пэрспэктывы цьмяныя:

“Ну вось у нас нядаўна быў заказчык прыватны, плянаваў будаваць, але адмовіўся. Грошай няма, крэдытаў не даюць. Хаця мы ўжо падпісалі зь ім дамову”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG