Найбольшыя спрэчкі выклікалі нормы, якія датычаць датэрміновага галасаваньня. Замежныя экспэрты прапаноўвалі альбо наагул яго скасаваць, альбо значна зьмяніць гэтую працэдуру. Беларускія спэцыялісты спасылаліся на тое, што ў шэрагу краінаў выбарцы галасуюць датэрмінова. Але там для датэрміновага галасаваньня павінна быць сур’ёзная падстава. Дарэчы, такое правіла дзейнічала і ў Беларусі падчас першых прэзыдэнцкіх выбараў 1994 году. Цяпер жа, каб загадзя прыйсьці на выбарчыя ўчасткі, дастаткова толькі жаданьня.
Знаўца выбарчага заканадаўства Сяргей Альфер лічыць, што праблема датэрміновага галасаваньня насамрэч найважнейшая:
“Паводле нашых дадзеных, вынікі датэрміновага галасаваньня істотна адрозьніваюцца ад вынікаў у дзень галасаваньня. За ўладнага кандыдата датэрмінова галасуюць 99—100% выбарцаў, а ў дзень галасаваньня — толькі 25—30%”.
Спадар Альфер упэўнены: калі Беларусь сапраўды хоча правесьці лібэралізацыю, то датэрміновае галасаваньне трэба наагул адмяніць:
“Як адзін з распрацоўшчыкаў зьмены выбарчага заканадаўства, я зыходзіў з таго, што беларускія ўлады на ніводных перамовах ніколі ня пойдуць на адмену датэрміновага галасаваньня. І таму мы прапаноўваем гэты інстытут істотна зьмяніць — праводзіць датэрміновае галасаваньне не на ўсіх участках, а толькі на адным. А калі выбарчая акруга вялікая і ахоплівае два-тры сельскія раёны — на двух ці трох.
Гэта дасьць магчымасьць тым людзям, якія хочуць прагаласаваць датэрмінова, гэта зрабіць. А па-другое, гэтую урну можна кантраляваць. Гэта ўсё ж не 30—50 участкаў, на якіх ідзе фальшаваньне. І ўзровень фальшаваньня будзе невялікім.
Ну, і самае галоўнае — каб датэрмінова маглі галасаваць толькі з канкрэтна вызначаных прычынаў”.
Экспэрты Бюро адмовіліся камэнтаваць вынікі дыскусіі. Яны спасылаюцца на тое, што, па-першае, гэта былі “тэхнічныя перамовы”, а па-другое, яны ня маюць паўнамоцтваў рабіць заявы для мэдыяў.
Сакратар Цэнтравыбаркаму Мікалай Лазавік адзначае: беларускія ўлады вытрымліваюць свае абяцаньні:
“Думаю, што канструктыўныя прапановы могуць знайсьці сваё адлюстраваньне ў канкрэтных пунктах заканадаўства альбо ў рэкамэндацыях па ўдасканаленьні працэдуры падрыхтоўкі і правядзеньня выбараў”.
Выбарчае заканадаўства ў сакавіку абмяркуе і грамадзка-кансультатыўная рада пры Адміністрацыі прэзыдэнта Беларусі. З гэтай нагоды Беларуская сацыял-дэмакратычная партыя (Грамада) ужо накіравала радзе свае прапановы, сказаў сёньня “Свабодзе” лідэр партыі Анатоль Ляўковіч:
“Чаму партыя прапануе гэта? Таму што ўвядзеньне зьмяшанай (прапарцыянальна-мажарытарнай) сыстэмы — гэта ўсё ж такі крок наперад. У тым сэнсе, што гэта дае большыя магчымасьці для разьвіцьця партыяў. Для таго, каб яны станавіліся нармальным суб’ектам палітычнай сыстэмы, як у любой дэмакратычнай краіне”.