Лінкі ўнівэрсальнага доступу

Сябра ПАРЭ патрабуе адмены дэкрэту Лукашэнкі


Пітэр Омтзіхт
Пітэр Омтзіхт

Нідэрляндзкі хрысьціянскі дэмакрат і сябра ПАРЭ Пітэр Омтзіхт зьвярнуўся зь лістом да Камітэту міністраў Рады Эўропы — кіроўнага і дырэктыўнага органу РЭ, які складаюць міністры замежных спраў 47 краін-чальцоў.


Нідэрляндзкі палітык зьвяртае ўвагу на чарговыя хвалі рэпрэсіяў у Беларусі і просіць Камітэт міністраў адказаць на некаторыя ягоныя пытаньні.

Пітэр Омтзіхт нагадвае, што ад 21 студзеня ў Беларусі ізноў мае сілу падпісаны прэзыдэнтам Лукашэнкам рэпрэсіўны дэкрэт № 555, які забараняе беларускім дзецям выезд за мяжу.

Сябра ПАРЭ робіць пры гэтым агаворку, што напярэдадні Калядаў беларускі кіраўнік у выніку міжнароднага ціску прыпыніў дзейнасьць дэкрэту да сярэдзіны студзеня. У сувязі з тым, што для арганізацыі зімовага адпачынку засталося вельмі мала часу, выехаць на зімовыя вакацыі змагло вельмі няшмат беларускіх дзяцей.

Як піша галяндзкі дэпутат, “дзецям ізноў не дазваляюць ехаць у краіны, якія не падпісалі зь Менскам шырокага пагадненьня зь вялікай колькасьцю гарантый. Гэта цалкам душыць працу няўрадавых арганізацый і робіць абмены цалкам немагчымымі”.

У той жа час Беларусь надае прыярытэтную значнасьць далучэньню краіны да Рады Эўропы. Але ж для гэтага ў краіне павінна палепшыцца сытуацыя з правамі чалавека, і адзін са складнікаў гэтага пытаньня — адмена забароны на паездкі”.

Сябра ПАРЭ Пітэр Омтзіхт задае кіроўнаму органу Рады Эўропы наступныя пытаньні:

  • “Ці згодны Камітэт міністраў, што абмежаваньні, выкладзеныя ў дэкрэце № 555, — гэта парушэньне права беларускіх дзяцей на свабоду перамяшчэньня (пры наяўнасьці бацькоўскага дазволу на выезд)?
  • Ці гатовы Камітэт міністраў выставіць у якасьці папярэдняй умовы для новага дыялёгу зь беларускім урадам сталую адмену дэкрэту № 555?
  • Якім яшчэ чынам Камітэт міністраў будзе даводзіць да беларускіх уладаў, што яны маюць адмяніць дэкрэт № 555 і дазволіць дзіцячыя абмены?

Галяндзкі палітык Пітэр Омтзіхт вядомы як адзін з ініцыятараў кампаніі па аднаўленьні паездак беларускіх дзяцей у замежжа.

15 сьнежня ён патрабаваў ад свайго ўраду зрабіць захады супраць беларускіх чыноўнікаў, якія перашкаджаюць выезду беларускіх дзяцей на калядныя вакацыі за мяжу.

Тады ў інтэрвію журналістам ён заявіў: “Болей за 20 гадоў тысячы беларускі дзяцей мелі магчымасьць адпачываць у Нідэрляндах. Яны жылі ў галяндзкіх сем’ях, дзе пра іх заўсёды добра клапаціліся. Мы хочам, каб чарнобыльскія дзеці ізноў атрымалі магчымасьць праводзіць вакацыі за мяжой”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG