Кіраўніком групы прызначаны намесьнік міністра замежных спраў Яўген Еўдачэнка, паведамляе “Наша Ніва”.
У распараджэньні Сідорскага гаворыцца, каб да "1 лютага забясьпечыць распрацоўку праекта пляну дзеяньня па разьвіцьці краінавага маркетынгу, які прадугледжвае прапановы аб накірунках узаемадзеяньня з замежнымі інвэстарамі, а таксама канкрэтныя меры па інфармаваньні замежных інвэстараў аб інвэстыцыйных магчымасьцях у Беларусі". У працоўную групу ўвайшлі 14 чалавек, у тым ліку два прадстаўнікі незалежнага сэктару — кіраўнік навукова-дасьледчага цэнтру Мізэса Яраслаў Раманчук і дырэктар лябараторыі аксіямэтрычных дасьледаваньняў “Новак”, старшыня Рады Беларускага інстытуту стратэгічных дасьледаваньняў Андрэй Вардамацкі.
“Ніякіх пасяджэньняў яшчэ не было, — заявіў Яраслаў Раманчук. — Пра ўступленьне ў гэтую групу са мной не гаварылі чыноўнікі, была размова толькі з людзьмі з сфэры маркетынгу. Я даў сваю згоду, але да апошняга не верыў, што ўрад можа гэта зацьвердзіць. Відавочна, што ўнутры ўлады назіраецца вялізны крызіс ідэяў. Залежыць гэта і ад фінансавага крызісу. Магчыма, што такім крокам улады спадзяюцца сьпіхнуць частку віны на тое, што адбываецца ў краіне, і на прадстаўнікоў незалежнага грамадзтва. Разам з тым, гэта выдатная пляцоўка для данясеньня сваіх думак і ідэй. Калі лорд Бэл кажа толькі пра касмэтычны рамонт, то мы гаворым пра капітальны. Што недастаткова проста прывабнай абгорткі, каб сюды прыйшлі інвэстыцыі. Асабіста я буду настойваць на поўнай празрыстасьці працы камісіі”.
