Прычына такога доўгага адпачынку ня толькі зімовыя сьвяты: на прадпрыемстве запоўненыя склады нерэалізаванай прадукцыяй.
Намесьніца дырэктара па ідэалягічнай рабоце, Людміла Гарадзецкая, кажа, што й іх прадпрыемства закрануў крызіс:
“Крызіс дайшоў і да нас, асабліва, што датычыць экспарту. У Расеі прыпынілася будаўніцтва, а ў нас шмат прадукцыі ішло ў Калінінградзкую вобласьць, у Літву таксама. Вось таму ў нас зьнізіўся экспарт”.
Спадарыня Гарадзецкая кажа, што сацыяльных праграмаў на прадпрыемстве імкнуцца не спыняць, а тое, што людзей адправілі ў адпачынак за свой кошт, дык, маўляў, кожны па асабістаму жаданьню напісаў заяву на сьвяты.
Рабочая прадпрыемства, Натальля, кажа, што такія адпачынкі ў іх здараюцца амаль штогод узімку й людзей зазвычай яны ня радуюць, паколькі потым на людзях балюча адбіваецца безграшоўе.
Пытаюся яе – ці абураюцца на гэта людзі?
Натальля: “Ну я ня ведаю. Абураюцца, вядома, людзі, але што рабіць? Вось як гэта называецца...”
Спадарыня Гарадзецкая сказала мне, што з 12 студзеня вытворчасьць павінны запусьціць, паколькі ёсьць заказы, але як справы на прадпрыемстве пойдуць далей яна ня ведае:
“Як будуць далей справы ісьці – мы ж ня можам прагназаваць. Усё залежыць ад таго, як нам будуць плаціць, як будаўніцтва будзе разьвівацца. Спадзяёмся на лепшае. Вось у Астраўцы плянуюць будаўніцтва АЭС, магчыма й мы да гэтага далучымся. Спадзяемся”.
